Ўзбекистонда 2020 йил давомида интернет хизматлари 29 фоизга арзонлаштирилиб, 1 мегабит/секунд трафик 40 минг сўмни ташкил қилди. Бу ҳақда АОКАдаги брифингда ахборот технологиялари ва коммуникацияларини ривожлантириш вазири Шуҳрат Содиқов маълум қилди.
«Мавжуд техник қувватларимизни кескин ошириш ҳисобига ўтган йил декабрь ойидан алоқа каналлари ижараси тарифлари 2 баробарга, ўтган йил давомида интернет хизматлари тарифлари эса 29 фоизга арзонлаштирилишига эришилди.
Ижтимоий соҳа объектларига, жумладан, 8 095 та халқ таълими, 5 440 та мактабгача таълим ва 3 207 та соғлиқни сақлаш муассасаларигача жами 14 минг километр оптик толали алоқа линиялари ташкил этилди ва юқори тезликдаги интернет тармоғига уланиш имконияти яратилди.
2020 йилнинг тўртинчи чорагида республикамиз бўйича 14 та, яъни ҳар бир ҳудудда биттадан таянч ИТ мактаблари ташкил этилди ва замонавий технологиялар билан жиҳозланди», – дейди Шуҳрат Содиқов.
Бундан ташқари, вазирнинг қўшимча қилишича, «Бир миллион дастурчи» лойиҳаси доирасида 120 мингдан зиёд ўқувчи жалб қилинган, улардан 18 минг нафардан ортиғи курсларни муваффақиятли тугатган.
Аввалроқ Ўзбекистонда аҳолини интернет тармоғи билан қамраб олиш даражаси 87 фоизга етказилгани, Ўзбекистондаги 12 246 та аҳоли яшаш масканларининг 56,8 фоизида 3Г, 95,5 фоизида 4Г алоқаси мавжуд эмаслиги аниқлангани ҳақида хабар берилганди.
Изоҳ (0)