Sirdaryo viloyatida is gazidan zaharlanish oqibatida 33 yoshli erkak va uning 26 yoshli turmush o‘rtog‘i vafot etdi. Ularning 2 yoshli qizi reanimatsiyaga yotqizildi. Bu haqda viloyat prokuraturasiga tayanib, O‘zA xabar berdi.
Ma’lum qilinishicha, Oqoltin tumani ichki ishlar bo‘limi navbatchilik qismining 8-yanvar 2021-yil soat 13:45 da bergan xabariga ko‘ra, Oqoltin tumani “Ko‘rkam diyor” MFY Marjonbuloq ko‘chasida yashovchi 1987-yilda tug‘ilgan fuqaro T.S., turmush o‘rtog‘i 1994-yilda tug‘ilgan I.S. va voyaga yetmagan farzandi 2019-yilda tug‘ilgan E.R. yashash xonadonida zaharlangan.
Zaharlanish oqibatida T.S. voqea joyida vafot etgan.
Shuningdek, turmush o‘rtog‘i I.S. va voyaga yetmagan farzandi E.R. Oqoltin tumani tibbiyot birlashmasining jonlantirish bo‘limiga yotqizilgan. Ko‘rsatilgan tibbiy yordamlarga qaramasdan, 26 yoshli I.S. shifoxonada vafot etgan.
Mazkur holat yuzasidan Oqoltin tumani prokuraturasi tomonidan tergovga qadar tekshiruv o‘tkazilmoqda.
Avvalroq Xorazmda 31 yoshli ayol va uning 10 yoshli qizi, Buxoroning Kogon shahrida 3 nafar fuqaro hamda Qoraqalpog‘istonda bir oilaning 4 nafar a’zosi va 2 nafar mehmon is gazidan zaharlanib vafot etgani haqida xabar berilgandi.
Izoh (0)