Samarqand viloyat IIB xodimlari muayyan yashash joyiga ega bo‘lmagan shaxslarga yordam ko‘rsatmoqda. Bu haqda “Daryo”ga viloyat IIB axborot xizmati ma’lum qildi.
Ta’kidlanishicha, patrul-post xizmati xodimlari uysiz qolib, ko‘p qavatli uylarning yerto‘lalarida, uy yo‘laklarida tunayotganlarni aniqlash bo‘yicha tadbir tashkil qilgan. Boshpanasiz fuqarolarni sovuqdan asrash uchun ularni reabilitatsiya markaziga olib borishni yo‘lga qo‘ygan.
“Uyga muhtojlar viloyat IIB, PPX va Jamoat tartibini saqlash bo‘limiga qarashli muayyan yashash joyiga ega bo‘lmagan shaxslarni reabilitatsiya qilish markazida tashkil etilgan ‘Mehr-saxovat’ boshpanasiga joylashtirilmoqda. Bu yerga bir kunda 20 nafarga yaqin kishi keltirilmoqda”, deyiladi viloyat IIB bergan xabarda.
Eslatib o‘tamiz, avvalroq Toshkent shahar IIBB xodimlari 35 dan ortiq uysiz odamni topib, ularni “Mehr-saxovat” uyida boshpana bilan ta’minlagani xabar berilgandi.
Izoh (0)