Қашқадарёда ҳомиладор аёлларни туғруқхонага етказиш учун дарёдан замбилда олиб ўтадиган, жин кўприкдан йиқилган яқинлари эса ногирон бўлиб қолаётган Калтатой қишлоғи аҳолисининг муаммоси ижобий ечим топадиган бўлди. Қишлоқ аҳолиси учун янги кўприк қуриб бериладиган бўлди, дея хабар берди «Дарё» мухбири.
Таъкидланишича, бу ҳақда 7 январь, пайшанба куни Қарши шаҳридаги Журналистлар уйида бўлиб ўтган матбуот анжуманида маълум қилинган.
Журналист ва блогерлар иштирокидаги матбуот анжуманида сўз олган вилоят Автомобиль йўллари ҳудудий бош бошқармаси бош муҳандиси Бўри Файзиев Президент Шавкат Мирзиёевнинг 2020 йил 12—13 ноябрь кунлари вилоятга ташрифидан сўнг ҳудудда 39 та кўприк қурилишини, мазкур кўприклар учун маблағ республика бюджетидан ажратилишини маълум қилди.
Масъул «Дарё» мухбирининг «Қамаши туманининг Калтатой қишлоғида жойлашган ва 20 йилдан бери таъмирталаблигича қолаётган жин кўприк республика бюджетидан қурилиши мўлжал қилинган 39 та кўприк ичида борми ёки рўйхатга киритилмаганми?», деган саволига «Қамашидаги кўприк вилоятда қурилиши мўлжалланган 39 та кўприкдан бири ва кўприк қурилишига 5 миллиард 400 миллион сўм маблағ ажратилган», дея жавоб берди.
Бўри Файзиевнинг маълумот беришича, Калтатой қишлоғидаги мазкур кўприк 108 метр узунликда қурилиши режалаштирилган.Эслатиб ўтамиз, «Дарё» мухбири билан 2020 йил май ойида суҳбатлашган қамашиликлар қиш ва баҳор ойларида аҳоли ҳомиладор аёлларни туғруқхонага етказиш учун дарёдан уларни замбилда олиб ўтишга мажбур бўлаётганини, жин кўприкдан йиқилганлар эса ногирон бўлиб қолаётганини айтиб берганди.
Изоҳ (0)