Vashingtonda yuzaga kelgan va AQSh Kongressi majlisiga xalaqit bergan tartibsizliklar milliy fojia hisoblanadi. Bu haqda AQSh sobiq prezidenti Jimmi Karter aytib o‘tdi, deb yozadi “RBK”.

Foto: Reuters

“Bu milliy fojia va bu bizning millat sifatidagi o‘zligimiz emas”, — dedi u.

Siyosatchi amerikaliklardan birlashishni va o‘zaro ziddiyatlarni xotirjamlik bilan hal qilishni so‘radi. Karterning eslatishicha, ilgarilari AQShda ikki asrdan oshiq vaqt davomida hokimiyatni tinch yo‘l bilan topshirishga muvaffaq bo‘lishgan.

AQShda prezident saylovlari 3-noyabr kuni bo‘lib o‘tdi. Natijalarni saylovchilar hay’ati 15-dekabr kuni qo‘llab-quvvatlab, demokratlardan nomzod Jo Baydenni g‘olib deb e’lon qildi. Kongress yakunlarni 6-yanvar kuni tasdiqlashi kerak edi. Bunga saylovda mag‘lub bo‘lgan prezident Donald Trampning tarafdorlari xalaqit berdi: ular Kongress binosi yonida yig‘ilib, ichkariga bostirib kirdi. Politsiya ularni faqat kuch bilan quvib chiqara oldi.

Keyinroq, 7-yanvar kuni AQSh Kongressi majlisini davom ettirib, Jo Baydenning AQShning 46-prezidenti etib saylanganini tasdiqladi va uning inauguratsiyasini 20-yanvarga belgiladi.