АҚШда демократлар Конгресс устидан назоратни қўлга киритди

АҚШ Демократик партияси Жоржия штатида Сенатга сайловларнинг иккинчи босқичида иккита мандатни қўлга киритди, шу тариқа Конгресснинг иккала палатаси устидан тўлиқ назорат ўрнатди, деб хабар бермоқда The New York Times.

Демократлардан номзодлар Жон Оссофф ва Рафаэл Уорнок амалдаги сенаторлар — республикачи Келли Лоффлер ва Давид Пердью устидан ғалаба қозонган. Улар тегишли равишда овозларнинг 50,4 ва 50,8 фоизини қўлга киритган. Рафаэл Уорнок Жоржия штатининг бутун тарихи давомида ушбу штатдан чиққан биринчи қора танли сенатор бўлади.

Financial Times аниқлик киритишича, Оссофф ва Уорнокнинг ғалабаси шуни англатадики, Сенат янги таркибидаги 100 та ўрин иккита партия ўртасида теппа-тенг бўлиб олинади, вице-президент лавозимига киришадиган Камала Харрис эса ҳал қилувчи овозга эга бўлади.

«Демократларнинг назоратга эга бўлиши Жо Байденнинг ой охирида лавозимига киришганидан кейин сиёсий кун тартибини амалга ошириш имкониятларини кўпайтиради», — деб ёзади нашр.

АҚШ Конгресси — Сенат ва Вакиллар палатасидан иборат қонун чиқарувчи орган. Сенат 100 кишидан иборат, Вакиллар палатасида 435 та ўрин бор. Ноябрдаги сайловлар якунларига кўра, демократлар Конгресснинг қуйи палатасида 222 та, республикачилар 211 та ўринни қўлга киритган эди.

Эслатиб ўтамиз, АҚШ Конгресси 7 январь кунги мажлисда Жо Байденнинг 46-АҚШ президенти этиб сайланганини расман тасдиқлади. У сайловчилар ҳайъатининг 306 та овозига эга бўлди. Амалдаги президент Дональд Трампнинг тарафдорлари 6 январь куни Конгресс сайловлар натижаларини тасдиқлаётган пайтда Конгресс биносини шиддатли ҳужум билан эгаллаб олди. Овозларни санаш тўхтатилди ва бир неча соатдан кейин яна давом эттирилди.