Коррупцияга қарши курашиш Миллий кенгаши томонидан Коррупцияга қарши курашиш халқаро стандартларини қонунчиликка имплементация қилишни давом эттириш бўйича йўл харитаси тасдиқланди. Бу ҳақда агентлик матбуот хизмати хабар берди.
Йўл харитаси Президентнинг «Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида»ги фармонига асосан агентлик, бош прокуратура ҳамда тегишли вазирлик ва идоралар билан биргаликда ишлаб чиқилган.
Унга мувофиқ, халқаро ташкилотлар томонидан ажратилган қарзлар ва молиявий ёрдамлар сарфининг ошкоралигини таъминлаш учун очиқ маълумотлар базаси шакллантирилади.
Шунингдек, «Давлат фуқаролик хизмати тўғрисида»ги қонунни қабул қилиш жараёнини тезлаштириш, давлат фуқаролик хизматига очиқ мустақил танлов асосида ишга қабул қилиш ҳамда уларнинг касбга оид фазилатлари ва алоҳида хизматлари (меритократия тамойили) асосида хизмат поғоналарида кўтарилишининг шаффоф механизмларини жорий этиш ҳам кўзда тутилган.
Маълумот учун, Ўзбекистоннинг умумий ташқи қарзи 2020 йилнинг 10 ойида 18 фоизга ўсиб, 1 октябрь ҳолатига 29,3 миллиард долларни ташкил этганди. Мамлакат қарзининг 2021 йилдаги умумий чегараси ЯИМга нисбатан 60 фоизга етмаслиги назарда тутилган бўлиб, келгуси йилда 5,5 миллиард доллар миқдорида қарз маблағларини жалб қилиш режалаштирилган.
Молия вазири Тимур Ишметов Ўзбекистоннинг ташқи қарзи миқдори халқаро меъёрларга нисбатан паст эканлигини билдирган.
Изоҳ (0)