Janubiy Koreyaning Evergreen Motors Co Ltd kompaniyasi Toshkent viloyatida avtomobil savdosi bilan shug‘ullanuvchi markazlashgan savdo majmuasi quradi, deb xabar bermoqda viloyat hokimligi.
Ta’kidlanishicha, Toshkent viloyati hokimi Rustam Xolmatov, viloyat hokimi o‘rinbosari Jamshid Abdusalomov Evergreen Motors kompaniyasi vakillari bilan uchrashuv o‘tkazgan. Unda xorij kompaniyasi ijrochi vitse-prezidenti Kim Ik Dong va viloyat hokimi Rustam Xolmatov ishtirokida viloyat hududida markazlashgan savdo majmuasi faoliyatini yo‘lga qo‘yish xususida muzokaralar olib borilib, ikki tomonlama kelishuv imzolandi.
Tadbirda O‘zbekiston va Janubiy Koreya o‘rtasidagi yaqin do‘stlik, hamkorlik aloqalari e’tirof etilib, loyihaning tashkiliy ishlarini amalga oshirish istiqbollari ko‘rib chiqildi.
Kelishuvga ko‘ra, Toshkent viloyatida Janubiy Koreya investorlari bilan hamkorlikda avtomobil savdosi bilan shug‘ullanuvchi markazlashgan savdo majmuasi va avtomobillarga texnik xizmat ko‘rsatish shoxobchalari ish boshlaydi.
Ta’kidlanishicha, hozirda loyihaning qurilish ishlari uchun viloyat hududidan 1 gektar yer maydoni ajratilgan. Umumiy qiymati 1 million AQSh dollarini tashkil etuvchi loyiha ishga tushirilgach 100 ta ish o‘rni yaratiladi. Loyiha 2021-yilning 4-choragiga qadar ishga tushirilishi ko‘zda tutilmoqda.
Avvalroq Sergeli avtomobil bozorini xususiylashtirish rejalashtirilayotgani hamda ushbu avtomobil bozori boshqa joyga ko‘chirilishi haqida xabar berilgandi.
Izoh (0)