O‘zbekiston tibbiyot muassasalarida yuritiladigan tibbiy hujjat shakllari qisqartirildi

O‘zbekiston tibbiyot muassasalarida yuritiladigan 408 ta tibbiy hujjat shakllari 252 tagacha qisqartirildi, deya xabar bermoqda Sog‘liqni saqlash vazirligi matbuot xizmati.

Sog‘liqni saqlash vazirining 2020-yil 31-dekabrdagi “O‘zbekiston Respublikasi Sog‘liqni saqlash vazirligi tizimidagi barcha davolash-profilaktika muassasalarida yuritiladigan tibbiy hisob hujjat shakllarini takomillashtirish to‘g‘risida”gi tegishli buyrug‘iga asosan, tibbiy hisob hujjatlarini yuritishning yangi tartiblari tasdiqlandi.

Ta’kidlanishicha, sog‘liqni saqlash vazirining ushbu buyrug‘i birlamchi tibbiy-sanitariya yordami muassasalari xodimlarining aholi bilan ko‘proq muloqotda bo‘lishini ta’minlash, profilaktik ishlar samaradorligini yana-da oshirish maqsadida qabul qilindi. Mazkur buyruq tizimdagi barcha davolash-profilaktika muassasalarida 2021-yilning yanvar oyidan boshlab yuritilishini ta’minlash maqsadida hududiy tibbiyot xodimlariga onlayn videoseminarlar orqali ham yetkazilmoqda.

Buyruq bilan shu davrga qadar butun tibbiyot tizimida barcha tibbiyot xodimlari (shifokor, farmatsevt, feldsher, hamshira, laborant va hokazo)lar tomonidan yuritib kelingan jami 408 ta tibbiy hujjat shakllari 252 tagacha qisqartirildi.

Ma’lum qilinishicha, tibbiy hisob hujjatlari orasida bir-birini takrorlaydigan shakllar optimallashtirildi. Masalan, qabul qilingan va rad etilgan homiladorlar, tug‘gan ayollarni hisobga olish jurnalining muassasada yuritiladigan boshqa jurnallarda takrorlanadigan qismi olib tashlandi. Bu esa, o‘z navbatida qabul bo‘limi xodimlari ishini yengillashtirib, bemorlarga sifatli tibbiy xizmat ko‘rsatish imkoniyatini oshiradi.

Birlamchi tibbiyot tizimi, shuningdek, qon bilan ishlash xizmati muassasalari xodimlari tomonidan yuritilayotgan tibbiy hujjat shakllarining yarmidan ko‘pi qisqartirilib, endilikda mazkur muassasa xodimlari tomonidan 25 turdagi tibbiy hujjat shakllari yuritilmoqda.

Davolash-profilaktika muassasalari 4 darajaga bo‘linadi. Ya’ni 1-darajali muassasalarga oilaviy shifokor punktlari, oilaviy poliklinikalar, ko‘p tarmoqli markaziy poliklinikalar, shahar va tuman tibbiyot birlashmalari, 2-darajali muassasalarga viloyat tibbiyot muassasalari, 3-darajali muassasalarga respublika tibbiyot muassasalari, 4-darajali muassasaga Milliy bolalar ko‘p tarmoqli tibbiyot markazi kiritilgan.

Takomillashtirilgan hujjat shakllari shifoxona qabul bo‘limi jurnallari, shifoxona bo‘limlari, ambulator-poliklinika muassasalari, laboratoriyalar, muassasalar zararsizlantirish bo‘limlari, tashkiliy-uslubiy bo‘lim xonalari, tez tibbiy yordam va sanitariya aviatsiyasi muassasalari, shuningdek, patologoanotomiya, sud-tibbiy ekspertiza, skrining, OITSga qarshi kurash markazlari, qon bilan ishlash muassasalarida, bundan tashqari, Sanitariya-epidemiologik osoyishtalik va jamoat salomatligi xizmati muassasalarida yuritiladigan blank, karta va jurnallardan iborat.