Toshkentda hovli qurish uchun ajratilgan yerlarda 3-4 qavatli “dom”lar qurilayotgani aholining noroziligiga sabab bo‘lmoqda — Jahongir Ortiqxo‘jayev

Toshkent shahrida 2020-yil davomida o‘tkazilgan xatlovda 100 dan ortiq yakka tartidagi uy-joy qurish uchun ajratilgan yer uchastkalarida uchdan ortiq qavatli uy-joylar qurilgani aniqlangan. Bu haqda 6-yanvar, chorshanba kuni bo‘lib o‘tgan Oliy Majlis Senatining o‘n birinchi yalpi majlisida Toshkent shahar hokimi, senator Jahongir Ortiqxo‘jayev aytib o‘tdi.

Parlament yuqori palatasining yalpi majlisida kun tartibidagi “O‘zbekiston Respublikasining Shaharsozlik kodeksini tasdiqlash haqida”gi qonun loyihasi muhokamaga qo‘yildi.

Kodeks loyihasi muhokamasida so‘z olgan Jahongir Ortiqxo‘jayevning ma’lum qilishicha, keyingi vaqtda ayrim fuqarolar tomonidan o‘zboshimchalik bilan qurilish ishlarini amalga oshirish holatlari ko‘payib ketgan.

Toshkent shahridagi yakka tartibdagi uy-joy qurish uchun ajratilgan yer uchastkasida ko‘p qavatli kvartirali uylar qurish holatlari ortib bormoqda. Bu qurilgan ko‘p qavatli kvartirali uylardagi muhandislik kommunikasiyalar tizimiga salbiy ta’sir o‘tkazmoqda: ayrimlari quvvatiga yetmay, ayrimlari esa turli xil avariyalar holatlarini keltirib chiqarmoqda.

2020-yil o‘tkazilgan xatlovda 100 dan ortiq yakka tartidagi uy-joy qurish uchun ajratilgan yer uchastkalarida uchdan ortiq qavatli kvartirali uy-joylar qurilgan. Ushbu holatlar shu atrofdagi aholining noroziligiga sabab bo‘lgan hamda kommunal sohadagi muammolarni keltirib chiqarmoqda.

Kodeks loyihasining 47-moddasida yuqorida qayd etilgan holatlarga barham beruvchi norma kiritildi. Ya’ni yakka tartibdagi uy-joy qurish uchun ajratilgan yer uchastkalarida ko‘p qavatli, ikki qavatdan ortiq uy-joy binolarini qurish ta’qiqlanadi. Shuningdek, aholi punktlarining bosh rejalarini tasdiqlashdan oldin jamoatchilik muhokamasiga qo‘yilishi belgilandi.

Kodeks loyihasining oltinchi bobida bevosita aholi noroziligining oldini oluvchi, ortiqcha ovoragarchilik va xarajatlarga sabab bo‘layotgan holatlarni bartaraf etuvchi normalar kiritilmoqda. Xususan, endilikda, tasdiqlanmagan aholi punktlarining bosh rejalari muhokamasidagi asosli takliflar inobatga olinishi nazarda tutilmoqda.

Jahongir Ortiqxo‘jayev, Toshkent shahar hokimi, senator 

• shaharsozlik faoliyati sohasidagi qarorlarning muhokamasida jamoatchilik nazoratining ishtirokini ta’minlash;
• yuridik va jismoniy shaxslarga yetkazilgan zararning o‘rni qoplanishining asosiy yo‘nalishlarini belgilab beradigan yangi norma;
• pudrat uchun davlat shartnomasini ishlab chiqish va tuzish tartibi hamda pudrat ishlari qat’iy shartnoma asosida amalga oshirilishi;
• shaharsozlik hujjatlarini ekspertizadan o‘tkazishda ekspertlarning huquqlari va javobgarligi ko‘rsatilgan.

Senat a’zolari ushbu qonun loyihasini ma’qulladi.