Давлат божхона қўмитасининг Контрабандага қарши курашиш ва божхона аудити бош бошқармаси томонидан Андижон вилоятида ўтказилган тезкор тадбир давомида дори воситалари ва тиббий буюмларнинг яширинча сақланаётгани аниқланди. Бу ҳақда қўмита матбуот хизмати хабар берди.
Олдиндан олинган тезкор маълумотлар асосида Андижон туманидаги бир-бирига қўшни бўлган 2 та уй белгиланган тартибда ва холислар иштирокида кўздан кечирилган. Текширув давомида ҳар иккала хонадонда 6 турдаги 3800 донадан ортиқ дори воситаси ва 10 минг дона лейкопластер тиббий буюмлари борлиги аниқланган.
Хорижда ишлаб чиқарилган, аммо сифатини ва божхона расмийлаштирувини тасдиқловчи ҳужжатлари бўлмаган мазкур товарларнинг умумий қиймати салкам 1 миллиард 300 миллион сўмни ташкил қилмоқда.
Ҳозирда ҳолат юзасидан божхона органлари томонидан суриштирув ҳаракатлари давом эттирилмоқда.
Аввалроқ Андижон вилоятида 738 миллион сўмлик пиротехника ва «Тропикамид» препарати мусодара қилингани ҳақида хабар берилган эди.
Изоҳ (0)