Ўзбекистонга 2020 йилнинг 25 декабрдан 2021 йилнинг 4 январь кунига қадар қабул қилинган 14 минг 700 нафар авиайўловчидан 34 нафарида коронавирус инфекцияси аниқланган. Бу ҳақда «Ўзбекистон24» телерадиоканалида маълум қилинди.
Кўрсатув давомида шифокор Гулчеҳра Собирова авиарейсдан келаётган йўловчилардан олинган экспресс тест натижаси мусбат чиқса, бундай йўловчилар тез ёрдам орқали Тошкент вилояти Зангиота туманидаги махсус шифохонага юборилаётганини айтиб ўтди.
«2020 йил 25 декабрдан шу кунгача 14 минг 700 нафар авиайўловчини қабул қилганмиз. Шулардан 34 нафарида мусбат натижа чиққан. Мана шу мусбат чиққан авиайўловчиларни тез ёрдам орқали шифохонага госпитализация қилинган», — деди Гулчеҳра Собирова.Эслатиб ўтамиз, 2020 йил 25 декабрдан бошлаб Ўзбекистонга коронавирус кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича Республика махсус комиссияси қарорига мувофиқ, мамлакатга кириб келаётган барча шахсларнинг ўз ҳисобидан чегара пункти ҳудудида коронавирус антигенини аниқлаш учун экспресс тест олиш тартиби жорий қилинганди.
Маълумот учун, Тошкент халқаро аэропортида экспресс тест олиш жараёнларини икки томонлама имзоланган шартномага асосан «Тиббиёт дунёси» МЧЖ амалга оширмоқда. Экспресс тест нархлари мазкур ташкилот ўрнатган таърифларга биноан 25—28 декабрга қадар 150 минг сўмдан, 28 декабрдан то бугунгача 95 минг сўм, талабалар учун 50 минг сўм миқдорида белгиланган.
Махсус комиссия кўрсатмасига кўра, аэропортдан учиб кетиш вақтида ПЦР тести олинади, Ўзбекистонга учиб келинганда экспресс тест олинади. Таҳлил натижалари 10 дақиқа мобайнида паспортларга штрих кодларини қўйиш орқали маълум қилинади.
Вирус аниқланган ҳолатда СЭС мутахассислари томонидан фуқаролар тегишли ҳудудда жойлашган коронавирус инфекциясини даволашга ихтисослашган муассасаларга жойлаштирилади ёки уй шароитида даволанишга йўналтирилади.
Шунингдек, Ўзбекистонга коронавирус ва янги штаммининг кириб келиши ҳамда тарқалишининг олдини олиш юзасидан кўрилаётган ушбу чора-тадбирларда ПЦР тестининг манфий натижаси тўғрисида йўловчиларда таҳлил натижалари мавжудлигидан қатъи назар улардан тегишли тартибда мажбурий экспресс тест олиниши белгилаб қўйилди.
Кўп ўринли самолётлар (жумладан, 260 ўринли ҳаво кемаси)даги йўловчиларни кутиб олишда тирбандликнинг олдини олиш мақсадида йўловчилар оқимини терминалнинг 3 та жойидаги тест олиш тиббиёт қисмларига йўналтириш ташкил қилинган.
Фуқароларнинг парвоздан бир неча кун аввалдан ПЦР тестини топшириш бўйича буюртма беришлари ҳам мумкин.
Қайд этилишича, аэропортнинг биргина учиб келиш залида 4 та банкомат ва 2 та валюта айирбошлаш шохобчаси мавжуд бўлиб, уларнинг мунтазам фаолият олиб бориши таъминлангани сабаб пул айирбошлашда муаммо кузатилмайди.
Изоҳ (0)