Koronavirus gripp tarqalishiga o‘xshash tarzda rivojlanadi. Vaksinatsiyaga qaramay, virus yo‘qolmaydi, balki respirator kasallikka aylanadi. Bu haqda rossiyalik infeksionist-shifokor, professor Nikolay Malishev ma’lum qildi, deb xabar bermoqda “RIA Novosti”.
“Qanday bo‘lmasin, biz u bilan qolgan butun vaqt davomida yashashimizga to‘g‘ri keladi. Uzoq vaqt davomida, ammo hozirgidek holatda emas”, — deya tushuntirgan u.
Shifokorning ta’kidlashicha, 2009-yilda gripp bilan kasallanish darajasi ham yuqori bo‘lgan va og‘ir kechgan, ammo keyinchalik vaziyat yengillashgan.
Rossiya sog‘liqni saqlash vaziri o‘rinbosari Oleg Gridnev dekabr oyi boshida mamlakatda koronavirus pandemiyasi taxminan 2021-yil o‘rtalarida pasayishini bildirgan. “Umid qilamizki, 2021-yil o‘rtalarida pandemiya hayotimizni tark eta boshlaganini ko‘ramiz”, — degan u.
Ayni paytda koronavirusga chalinganlar soni dunyo bo‘yicha 85 million kishidan oshgan. Barcha kasallanish holatlarining yarmidan ko‘pi besh davlat – AQSh, Hindiston, Braziliya, Rossiya va Fransiya hissasiga to‘g‘ri keladi.
JSST rahbari Tedros Gebreyesus 2021-yilda dunyo mamlakatlari koronavirusning yangi varianti kabi yangi sinovlarga duch kelishini ma’lum qilgan edi. Kasallikning shunday yangi varianti dekabr oyi o‘rtalarida Buyuk Britaniyada aniqlandi. Mamlakat bosh vaziri Boris Jonsonning so‘zlariga ko‘ra, bu shtamm odatdagisidan 70 foizga yuqumliroq.
Izoh (0)