Коронавирус грипп тарқалишига ўхшаш тарзда ривожланади. Вакцинацияга қарамай, вирус йўқолмайди, балки респиратор касалликка айланади. Бу ҳақда россиялик инфекционист-шифокор, профессор Николай Малишев маълум қилди, деб хабар бермоқда «РИА Новости».
«Қандай бўлмасин, биз у билан қолган бутун вақт давомида яшашимизга тўғри келади. Узоқ вақт давомида, аммо ҳозиргидек ҳолатда эмас», — дея тушунтирган у.
Шифокорнинг таъкидлашича, 2009 йилда грипп билан касалланиш даражаси ҳам юқори бўлган ва оғир кечган, аммо кейинчалик вазият енгиллашган.
Россия соғлиқни сақлаш вазири ўринбосари Олег Гриднев декабрь ойи бошида мамлакатда коронавирус пандемияси тахминан 2021 йил ўрталарида пасайишини билдирган. «Умид қиламизки, 2021 йил ўрталарида пандемия ҳаётимизни тарк эта бошлаганини кўрамиз», — деган у.
Айни пайтда коронавирусга чалинганлар сони дунё бўйича 85 миллион кишидан ошган. Барча касалланиш ҳолатларининг ярмидан кўпи беш давлат – АҚШ, Ҳиндистон, Бразилия, Россия ва Франция ҳиссасига тўғри келади.
ЖССТ раҳбари Тедрос Гебрейесус 2021 йилда дунё мамлакатлари коронавируснинг янги варианти каби янги синовларга дуч келишини маълум қилган эди. Касалликнинг шундай янги варианти декабрь ойи ўрталарида Буюк Британияда аниқланди. Мамлакат бош вазири Борис Жонсоннинг сўзларига кўра, бу штамм одатдагисидан 70 фоизга юқумлироқ.
Изоҳ (0)