Дунё бўйича коронавирусга чалинганлар сони бир ой ичида 20 миллион нафарга кўпайиб, 85 миллион кишига етди. Барча касалланиш ҳолатларининг ярмидан кўпи беш давлат – АҚШ, Ҳиндистон, Бразилия, Россия ва Франция ҳиссасига тўғри келади, дея хабар бермоқда «РБК».
Жонс Ҳопкинс университети маълумотларига кўра, дунё бўйича коронавирус инфекциясини юқтириб олиш билан боғлиқ ҳолатлар сони 85 миллиондан ошди. 1,8 миллион киши касаллик қурбонига айланган. Ой давомида 20 миллион нафар янги бемор қайд этилган: 4 декабрь куни COVID-19 га чалинганлар умумий сони 65 миллион нафар эди.
Касаллик энг кўп қайд этилган давлатлар бешлигидан қуйидагилар ўрин олган:
- АҚШ — 20,6 миллион киши;
- Ҳиндистон — 10,3 миллион;
- Бразилия — 7,7 миллион;
- Россия — 3,2 миллион;
- Франция — 2,7 миллион.
Маълумот учун, 2 январь ҳолатига кўра, Ўзбекистонда 77 231 кишида (жумладан, 2 январнинг ўзида 49 кишида) коронавирус аниқланган. Расмий статистикага кўра, касаллик оқибатида 614 киши вафот этган («Дарё» томонидан 2020 йил 22 сентябрга қадар юритилган статистика маълумотларига кўра, қурбонлар сони камида 633 нафар). Беморларнинг 98 фоизи ёки 75 358 нафари соғайган. Айни вақтда, Ўзбекистон расмийлари коронавирусга чалинганлар сони ҳақиқатда расмий статистикадагидан бир неча баробар кўп бўлиши мумкинлигини инкор этмайди.
Жаҳон соғлиқни сақлаш ташкилоти (ЖССТ) раҳбари Тедрос Гебрейесус 2021 йилда дунё мамлакатлари коронавируснинг янги варианти каби янги синовларга дуч келишини маълум қилган эди. Касалликнинг шундай янги варианти декабрь ойи ўрталарида Буюк Британияда аниқланди. Мамлакат бош вазири Борис Жонсоннинг сўзларига кўра, бу штамм одатдагисидан 70 фоизга юқумлироқ.
Айни вақтда, ЖССТ вакилларининг таъкидлашича, вируснинг ушбу генетик варианти касаллик кечишининг оғир-енгиллигига таъсир қилмайди. Коронавируснинг янги штамми Буюк Британиядан ташқари бошқа мамлакатларда ҳам, хусусан, Дания, Италия, Австралия, Хитой, Туркия ва АҚШда ҳам аниқланган. Ўзбекистонда ҳозирча ушбу штамм аниқлангани йўқ.
Изоҳ (0)