Moskva arbitraj sudi “GAZ” markasidagi avtomobillarning o‘yinchoq modellari bilan noqonuniy ravishda savdo qilib kelgan Xitoyning “Alisa” internet do‘koniga nisbatan boshlangan ish yuzasidan hukm chiqardi. Sud avtomobil ishlab chiqaruvchi tarafida bo‘lib, sotuvchiga “GAZ” uchun kompensatsiya to‘lash majburiyatini yuklagan, deb xabar beradi Motor.
Javobgar “Alisa xalqaro savdo kompaniyasi” AJ o‘zining sayti orqali sovet davriga oid mashhur avtomobillarni Play Smart brendi ostida sotgan. Bu orqali u “GAZ/Begushiy olen”, “GAZ”, “Volga” va “Tigr” kabi tovar belgilariga egalik huquqi bor avtomobil ishlab chiqaruvchining huquqlarini buzgan. Birinchi instansiya sudi da’voni to‘liq qondirib, talab etilgan 180 ming rubl (2,4 ming dollar) miqdoridagi kompensatsiyani maqbul deb topgan.
Shu yilning bahorida tovar belgisidan foydalanish muammosiga “AvtoVAZ” duch kelgandi, ya’ni avvalroq “GM AvtoVAZ” nomi bilan tanilgan “Lada Zapad Tolyatti”. Reklama kompaniyalaridan biri avtomobil ishlab chiqaruvchi noqonuniy ravishda 4x4 belgisidan foydalanayotganini ta’kidlagan. Firma buning uchun “AvtoVAZ”dan besh million rubl talab qilgan, biroq bu hech qanday samara bermagan — sud avtomobil ishlab chiqaruvchi foydasiga hukm chiqargan.
2020-yilda Kia ham shu kabi vaziyatga tushib qoldi. Rostovlik bankrot bo‘lgan biznesmen Oleg Ivus XLine savdo belgisi 2015-yildan buyon o‘ziga tegishli ekanligini ma’lum qilgan. Tadbirkor Kia Motors Corporation va “Kia Motors Rossiya va MDH” ustidan da’vo kiritib, kompensatsiya talab qilgan. Oktabr o‘rtalarida Moskva arbitraj sudi Ivusning da’vosini qanoatlantirmagani ma’lum bo‘lgan. Shunga qaramay, Rio X-Line nomi Rio X’ga o‘zgartirilgan, biroq nomning o‘zgartirilishi da’voga bog‘liq emasligi aytilmoqda.
Izoh (0)