Barcha uchun og‘ir va sinovli o‘tgan 2020-yil ham oxirlab bormoqda. Mazkur yilda koronavirus pandemiyasi sabab ko‘plab yirik sport musobaqalari qoldirildi. Xususan, Tokio—2020 Olimpiadasi va Yevro–2020 kabi muhim ahamiyat kasb etuvchi turnirlar bir yil muddatga kechiktirildi. Boshqalarini esa biroz noodatiy formatda o‘tkazishga to‘g‘ri keldi. Shuningdek, ortda qolayotgan yil sport olami uchun katta yo‘qotishlari bilan ham yodda qoldi. Diyego Maradona, Kobi Brayant, Paolo Rossi va Abdulmanap Nurmagomedov kabi buyuk sport darg‘alari bu foniy dunyo bilan vidolashdi. Shunga qaramay, 2020-yil eslashga arziydigan voqealarga boy bo‘ldi deb aytish mumkin.
“Daryo” quyida sizni 2020-yilda Jahon futbolida sodir bo‘lgan eng e’tiborga molik voqealarni eslashga taklif etadi.
“Karantinli futbol”
Sport turlari orasida futbol pandemiya holatidan birinchilardan bo‘lib chiqdi. O‘yinlar muxlislarsiz va karantin qoidalariga amal qilingan holda o‘tkazildi. Bunda futbolchilarga maydonga tupurish, o‘zaro libos almashish va gol urilganidan so‘ng bir-birini quchoqlab (keyinchalik bekor qildi) tabriklash taqiqlandi. Kulgili-a, shundaymi? Biroq pandemiya shunga majbur qildi, nachora. Shuningdek, karantin sabab yuzaga kelgan taqvimdagi tig‘izlik tufayli futbolchilarni avaylash uchun zamonaviy futbolda ilk bor bir o‘yin davomida beshtagacha futbolchi almashtirishga ruxsat berildi. Xursand qiladigan jihat, yil yakuniga borib, ko‘plab mamlakatlarda muxlislar tashrifiga ruxsat berildi, bu esa futbol ishqibozlari bilan birgalikda o‘yinchilarni ham birdek xushnud etdi. Axir, futbol muxlislar uchun o‘ynaladi-ku...
“Takrorlanmas” Chempionlar Ligasi
Shubhasiz, pandemiya tufayli ortda qolgan Chempionlar Ligasi mavsumi ham o‘ziga xos va noyob tarzda o‘tdi. Barcha milliy chempionatlar amal-taqal qilib tugatilgach, kun tartibidagi asosiy masala Yevrokuboklar bo‘lib qoldi. Shunda UEFA barcha jamoalarni Lissabonga (Portugaliya) yig‘ishga va musobaqani markazlashgan holda yakunlashga qaror qildi. Ushbu holatda pley-off o‘yinlari bitta bahsdan iborat bo‘ldi. Bu qarorga kelish tashkilot uchun qanchalik og‘ir bo‘lmasin, vaziyat shuni taqozo etardi. Chunki chor-atrofda ko‘rinmas balo izg‘ib yurardi.
Xo‘sh, COVID-19 Chempionlar Ligasi finaliga ta’sir qildimi? Buning uchun 2018/19-yilgi “Liverpul” va “Tottenhem” o‘rtasidagi uchrashuvni eslashning o‘zi kifoya. O‘shanda hatto gavjum stadion ham o‘yinni “qizdirib” bera olmagandi. Bu yili tribunalar bo‘sh, birinchi bo‘lim golsiz o‘tgan bo‘lsa ham, oldingi yilgi Chempionlar Ligasi finaliga qaraganda ko‘proq voqealarga boy bo‘ldi deyish mumkin, bu yerda motivatsiya o‘z so‘zini aytdi. Bu bilan o‘tgan yilgi finalda motivatsiya yo‘q edi degan fikr ilgari surilmayapti. Shunchaki Neymar barchaga Messisiz ham kuchli ekanligini isbotlashni, Mbappe 21 yoshida ham terma jamoa (Mbappe 2018-yilda Fransiya terma jamoasi bilan Jahon chempioni bo‘lgan), ham klub miqyosidagi eng katta ikkita yirik musobaqada g‘olib bo‘lishni istardi. Levandovski boshchiligidagi “Bavariya” esa o‘zining Yevropadagi tengsiz ekanligini ko‘rsatmoqchi edi.
Yakunda “futbolni 22 kishi o‘ynaydi, yakunda esa nemislar g‘alaba qozonadi” degan ibora o‘z isbotini topdi, “Bavariya” tizimli futbolning natijasini ko‘rsatdi. Jamoa karantindan oldin ham g‘alaba qozonayotgandi, undan keyin ham to‘xtamadi. Aftidan, unga hech narsa ta’sir qilmaydigandek, na koronavirus va karantin. Nima bo‘lsa ham g‘alaba qozonaveradi.
Ushbu Chempionlar Ligasini eslab qoling. To‘g‘ri, uning g‘olibi hech kimni ajablantirmadi, ammo jamoalarning finalgacha bo‘lgan yo‘li mislsiz hodisa edi. Bunaqasi endi boshqa bo‘lmaydi (bo‘lishini hech kim xohlamasa ham kerak).
“Liverpul”ning 30 yillik orzusi
Angliyaning eng tarixiy klublaridan biri “Liverpul” so‘nggi yillarda o‘z nomini qayta tiklashga muvaffaq bo‘ldi. Jamoada Virjil van Deyk, Allison, Muhammad Saloh va Sadio Mane kabi yulduzlar paydo bo‘ldi. Yurgen Klopp jamoasi 2018/19-yilgi mavsumda Chempionlar Ligasi bosh sovriniga ega chiqqan edi, 2020-yilda esa naq 30 yillik tanaffusdan keyin Angliya Premyer Ligasida zafar quchdi. Buning uchun Mersisayd klubi uzoq va og‘ir yo‘lni bosib o‘tdi.
“Liverpul” o‘tgan mavsumda Premyer Ligadagi aksariyat rekordlarning ham muallifi bo‘ldi. Misol uchun, “qizillar” turnirda 31 ta o‘yinda g‘alaba qozonib, bir mavsumda bunday ko‘rsatkichga erishgan yagona jamoaga aylandi. Bundan tashqari, mersisaydliklar liga tarixidagi eng erta chempionlikni qayd etdi. “Qizillar” chempionat yakunlanishiga 7 tur qolganida o‘zlari uchun chempionlikni kafolatlab qo‘ygandi. Umuman olganda, “Liverpul”ning takrorlagan, yangilagan va o‘rnatgan rekordlari haqida soatlab to‘xtamasdan gapirish mumkin. Asosiysi, “qizillar” 30 yillik tanaffusdan keyin munosib tarzda chempionlikni qo‘lga kirita oldi. Muhimi shu.
Messining arazlashi
2020-yilning eng asosiy voqealaridan yana biri, faoliyati davomida faqat “Barselona” safida to‘p surgan Messining katalon klubini tark etishga qaror qilgani bo‘ldi. Uni klubning so‘nggi yillardagi natijalari, maqsadlari va rahbariyati qoniqtirmadi. Shuningdek, uning birin-ketin do‘stlari ham klubdan badarg‘a qilina boshladi. Messi shu sabablar tufayli klub rahbariyatiga ketishi to‘g‘risida byurofaks yubordi. Biroq sobiq prezident Xosep Bartomeu bunga yo‘l qo‘ymadi va pandemiya sharoitida uning tovon pulini 700 million yevro etib belgiladi. Yakunda Messi jamoada qolishga majbur bo‘ldi.
“Doimo “Barselona” mening hayotim ekanini aytib kelganman. 13 yoshimdan shu yerda yashayman. Men ham klub, ham shaharda katta bo‘ldim. Vatanim Argentinaga qaraganda, Barselonada uzoqroq yashaganman. Bu yerda hamma narsani o‘rgandim, klub meni futbolchi va inson sifatida tarbiyaladi. “Barsa” menga hamma narsani berdi, men ham doimo “Barselona” uchun borimni berganman.
Agar o‘tgan yozda bepul ketmoqchi bo‘lganimda, sudga murojaat qilib, ishni yutib chiqardim. Bu haqida menga ko‘plab advokatlar aytdi. Biroq shunchaki bu tarzda ketishni xohlamadim”, — deydi Messi jamoadan ketmoqchi bo‘lgani haqida.
Umuman olganda, futbol olami 2020-yilda juda ko‘plab voqealarga boy bo‘ldi. Afsuski, ularning barchasini sanab o‘tishning imkoni yo‘q. Shuning uchun aybga buyurmaysiz degan umiddamiz. Kirib kelayotgan 2021-yilda sizga tinchlik-osoyishtalik, sihat-salomatlik va oilaviy baxt doimiy hamroh bo‘lsin!
Bilol ERKIN tayyorladi
Izoh (0)