Dunyoda boshqa dinga e’tiqod qilib, ma’lum vaqtdan so‘ng islom dinini qabul qilgan insonlar ko‘p. Tabiiyki, ular orasida sportchi va futbolchilarni ham uchratish mumkin. Quyida islom dinini qabul qilgan taniqli futbolchilar haqida fikr yuritamiz.
Frank Riberi
O‘zining “Bavariya”dagi yorqin o‘yinlari bilan tanilgan “Fiorentina” futbolchisining islomni qabul qilishiga rafiqasi sababchi bo‘lgan. Riberi 2006-yilda jazoirlik qizga uylanayotganda islom dinini qabul qiladi va Bilol ismini oladi.
Tyerri Anri
Islomni qabul qilgan yana bir taniqli futbolchi, bu Anridir. Uning bu qarorga kelishiga musulmon do‘stlari (Abidal, Riberi) sababchi bo‘lgan — bunda Anrining “Barselona”dagi sobiq jamoadoshi Erik Abidalning roli katta bo‘lgani aytiladi. Anrining so‘zlariga ko‘ra, islom u uchun hamma narsadan muhimroq bo‘lib qolgan.
Erik Abidal
Yuqorida tilga olingan “Barselona” sobiq futbolchisi 2003-yilda islomni qabul qiladi va Riberi kabi Bilol ismini oladi. Abidal intervyularidan birida bu (islomga kirish) unga kuch va ilhom bag‘ishlashini aytgandi. Erik ham hayot yo‘llarini jazoirlik ayol bilan bog‘lagan.
Nikolya Anelka
Islom dinini qabul qilgan fransiyalik futbolchilardan yana biri Anelka bo‘lgan. “Arsenal”, “Real”, “Chelsi” va PSJ kabi grand jamoalar tarkibidagi ajoyib harakatlari bilan yodda qolgan Nikolya 2004-yilda islomga kiradi. O‘zining aytishicha, Parij atrofida jazoirlik muhojirlar bilan birga voyaga yetgani uni halol inson bo‘lishiga va ularning diniga kirishiga sabab bo‘lgan.
Pol Pogba
“Manchester Yunayted”dagi bir necha yillik muvaffaqiyatsiz o‘yinlariga qaramay, bugungi kunda dunyoning eng yaxshi yarim himoyachilaridan biri bo‘lib turgan Pogba ham Islom diniga e’tiqod qiladi va hatto 2019-yilda Haj safarini ado etgan. Garchi, onasi islom diniga e’tiqod qilsa-da, Pol tug‘ilganida musulmon bo‘lmagan va keyinchalik bu qarorga kelgan.
“Islom dini meni o‘zgarishga va hayotda ko‘p narsalarni tushunishga majbur qildi. Men bunda xotirjamlik topdim. Faqat musulmonlar orasidagina irqchilikni ko‘rmadim”, — deydi Pogba.
Shuningdek, turli manbalarda Niderlandiya terma jamoasi sobiq hujumchisi Robin van Persining ham islom dinini qabul qilgani haqida ma’lumotlar mavjud. Biroq futbolchining o‘zi e’tiqodi haqida omma oldida gapirmaslikni ma’qul ko‘radi.
Mavzuga doir: Islom dinini qabul qilgan jahon yulduzlari (foto)
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)