Toshkent shahrining Yunusobod tumanidagi xonadonlarning biridan umumiy qiymati 294,3 million so‘mlik qadoqsiz holdagi 153 kilogramm dori vositalari topildi. Bu haqda Davlat bojxona qo‘mitasi matbuot xizmati xabar berdi.
Kontrabandaga qarshi kurashish va bojxona auditi bo‘limi, DXX va Bosh prokuratura huzuridagi Iqtisodiy jinoyatlarga qarshi kurashish departamentining Toshkent viloyati boshqarmasi xodimlari bilan hamkorlikda o‘tkazilgan tezkor tadbir davomida X.X. ismli fuqaro o‘z xonadonida 166 dona qutida 9960 dona “Zinc+ vitamin C”, 24 qutida “Magniy B6” nomli dori vositalari hamda 70 000 dona “Zinc+ vitamin C” nomli etiketkalarini noqonuniy saqlab kelayotgani aniqlangan.
Mazkur dori vositalari yashirin sexlarda tayyorlanib olib kelinib, keyinchalik qadoqlab qayta sotish maqsadida tayyorlab qo‘yilgan.
Hozirda yuqoridagi holatlar yuzasidan bojxona organlari tomonidan surishtiruv harakatlari davom ettirilmoqda.
Avvalroq Namangan, Qo‘qon va Andijonda mashinasida minglab “Lirika” va “Tramadol” olib yurgan shaxslar aniqlangan, Toshkent viloyatida 200 quti “Remdesivir” dorisini jami 170 millionga sotgan shaxs qo‘lga olingan edi.
Izoh (0)