“O‘zbekiston temir yo‘llari” Toshkent metrosining Yunusobod yo‘nalishi qurilishida olti kishining o‘limiga sabab bo‘lgan avariya bo‘yicha tergov tafsilotlarini ma’lum qildi.
Ma’lum qilinishicha, qurilish ishlarining bajarilishi ustidan nazoratni susaytirgani uchun va bo‘ysunuvchi korxonalarda o‘lim bilan yakunlangan guruhli baxtsiz hodisani keltirib chiqargani uchun “Ko‘prikqurilish” tresti menejeri Qudrat Isayev 22-yanvar kuni egallab turgan lavozimidan ozod etilgan.
Hodisa yuzasidan Toshkent shahar prokuraturasi tomonidan Jinoyat kodeksining 257-moddasi (mehnatni muhofaza qilish qoidalarini buzish) 2-qismi “a” bandi, 258-modda (tog‘-kon, qurilish yoki portlatish ishlari xavfsizligi qoidalarini buzish) 2-qismi “a” bandi bo‘yicha jinoyat ishi qo‘zg‘atilgan.
Tekshiruv davomida “O‘zbekiston temir yo‘llari”ning “Ko‘prikqurilish” tresti 67-sonli ko‘prik qurilish ekipaji boshlig‘ining o‘rinbosari (qurilish uchun mas’ul) Otabek Alimov, otryad boshlig‘i Saidbek Bobojonov, qurilish ishlari bo‘yicha otryad brigadasi Salohiddin Ashurov, “Toshkent metropoliteni”ning Metropoliten liniyalarini qurish direksiyasi ishlab chiqarish bo‘limining qurilish-montaj ishlari katta inspektori Bahodir Muhammadrahimov 257-moddaning 2-qismi “a” va “b” bandlarida (mehnatni muhofaza qilish qoidalarini buzish odam o‘limi va boshqa og‘ir oqibatlar kelib chiqishiga sabab bo‘lishi), 258-moddaning 2-qism alohida inobatga olingan belgilar mavjudligi aniqlangan.
Biroq ular ilgari sudlanmaganliklari, marhumlarning oila a’zolari tomonidan e’tirozlar mavjud emasligi, shuningdek, ularga berilgan ijobiy tavsifnoma inobatga olinib, yuqorida qayd etilgan shaxslarga nisbatan jinoiy ish to‘xtatilgan.
“Yunusobod yo‘nalishining yangi bekatlarida qurilish ishlari 2020-yil iyul oyida yakunlanib, joriy yilning avgust oyi oxirida foydalanishga topshirildi. Ushbu yo‘nalish foydalanishga topshirilgan kundan boshlab hech qanday kamchiliklar aniqlanmagan, barcha bekatlar va metro tunnellari belgilangan me’yor va standartlarga muvofiq ishlamoqda, yo‘lovchilar tomonidan e’tiroz va shikoyatlar kelib tushmagan”, — deb ta’kidlangan “O‘zbekiston temir yo‘llari” matbuot xizmati xabarida.
Nima bo‘lgan edi?
2019-yil 18-dekabr kuni soat 10:20 da Toshkent metropolitenining Yunusobod liniyasida qurilayotgan yangi bekat hududida qazilgan kotlovan yon tomoni o‘pirilgan.
Mazkur holat tinimsiz yog‘ingarchiliklar sababli sodir bo‘lgan. O‘zbekiston Gidrometeorologiya markazining ma’lumotlariga ko‘ra, 2019-yilning 18-dekabr kuni Toshkent shahrining Yunusobod tumanida soat 07:40 dan 15:50 gacha yog‘ingarchilik miqdori 12 millimetrni tashkil etib, shaharning qolgan hududlariga nisbatan ko‘proq bo‘lgan. Voqea oqibatida qulab tushgan tuproq massasi qurilish ishlariga jalb etilgan olti nafar ishchini bosib qolgan.
O‘zbekiston Prezidenti farmoyishiga binoan tezkor ravishda hodisa sabablari va oqibatlarini o‘rganish, yerusti va yerosti metropoliteni obyektlarida bunday hodisalarning oldini olish bo‘yicha zarur chora-tadbirlarni amalga oshirish maqsadida hukumat komissiyasi tashkil etilgan.
19-dekabrdagi qidiruv-qutqaruv ishlari natijasida yuqorida qayd etilgan barcha ishchilarning jasadlari topilgan.
Kompensatsiya to‘lovlari
Qurbonlarning oilalariga birlamchi tovon puli sifatida 100 million so‘mdan to‘lab berilgan.
Keyinchalik hukumat komissiyasi qarori bilan vafot etgan 5 nafar ishchilarning oilalariga 261,9 million so‘mlik, shuningdek, yana bir vafot etgan xodimning oilasiga 281 million so‘mlik bir martalik tovon puli to‘langan. Ushbu bir martalik to‘lovlar marhumlarning oilalariga to‘lab berilgan. Ushbu mablag‘lardan tashqari, ularning oila a’zolariga har oyda quyidagi miqdorlarda oylik kompensatsiyalar to‘lab borilmoqda:
- marhum Diyorov Anvarning turmush o‘rtog‘i, bir o‘g‘li va ikki qiziga — 727,6 ming so‘mdan;
- marhum Abdullayev Davronning pensioner onasiga — 1212,68 ming so‘mdan ortiq;
- marhum Abdullayev Oybekning pensioner ota va onasiga, shuningdek, o‘g‘li va qiziga — 606,34 ming so‘mdan;
- marhum Ravshanov Jonibekning nafaqaxo‘r otasi va onasi, qizi hamda turmush o‘rtog‘iga —519,72 ming so‘mdan;
- marhum Karimov Zarif To‘lqinovichning uch qizi, bir o‘g‘li va turmush o‘rtog‘iga — 650,6 ming so‘mdan.
Ma’lumot uchun, ekspertiza xulosasiga ko‘ra, metro bekati tunnelining temir-beton konstruksiyasi qulab tushganiga tunnelni ochiq usulda kovlashda texnik xavfsizlik qoidalarining buzilganligi va qurilish ishlarining sifatsiz bajarilganligi sabab bo‘lgan. Bu mas’ul shaxslarning jarayonni yetarlicha nazorat qilmaganligi natijasida sodir bo‘lgan.
Aynan shu fojiadan so‘ng Yunusoboddagi metroning yangi bekatlari ochilishi 2019-yil oxiridan 2020-yil Navro‘ziga qoldirilgandi, Prezident Shavkat Mirziyoyev esa 2020-yilda o‘tkazilgan ilk yig‘ilishlarning birida qurilish sohasida mehnat muhofazasini kuchaytirish bo‘yicha ko‘rsatma berdi.
Izoh (0)