Тошкент шаҳрининг Юнусобод туманидаги хонадонларнинг биридан умумий қиймати 294,3 миллион сўмлик қадоқсиз ҳолдаги 153 килограмм дори воситалари топилди. Бу ҳақда Давлат божхона қўмитаси матбуот хизмати хабар берди.
Контрабандага қарши курашиш ва божхона аудити бўлими, ДХХ ва Бош прокуратура ҳузуридаги Иқтисодий жиноятларга қарши курашиш департаментининг Тошкент вилояти бошқармаси ходимлари билан ҳамкорликда ўтказилган тезкор тадбир давомида Х.Х. исмли фуқаро ўз хонадонида 166 дона қутида 9960 дона «Zinc+ витамин C», 24 қутида «Магний B6» номли дори воситалари ҳамда 70 000 дона «Zinc+ витамин C» номли этикеткаларини ноқонуний сақлаб келаётгани аниқланган.
Мазкур дори воситалари яширин цехларда тайёрланиб олиб келиниб, кейинчалик қадоқлаб қайта сотиш мақсадида тайёрлаб қўйилган.
Ҳозирда юқоридаги ҳолатлар юзасидан божхона органлари томонидан суриштирув ҳаракатлари давом эттирилмоқда.
Аввалроқ Наманган, Қўқон ва Андижонда машинасида минглаб «Лирика» ва «Трамадол» олиб юрган шахслар аниқланган, Тошкент вилоятида 200 қути «Ремдесивир» дорисини жами 170 миллионга сотган шахс қўлга олинган эди.
Изоҳ (0)