Mahalladagi ahvol vazirlik, idoralar va hokimliklar ishini baholashda bosh mezon bo‘ladi — Shavkat Mirziyoyev

O‘zbekistonda mahalliy hokimlik va kengashlar bundan 27 yil avval qabul qilingan qonun asosida ishlamoqda. Prezident Shavkat Mirziyoyevning ta’kidlashicha, bu hujjat “bugungi islohotlarimiz talablariga mutlaqo javob bermaydi”, shu bois “uni tubdan yangilash zarur”.

Davlat rahbarining qayd etishicha, “islohotlarimiz natijalari, bo‘layotgan o‘zgarishlar va aholining kayfiyati avvalo mahallada seziladi”. Bundan buyon, mahalladagi ishlarning ahvoli vazirlik, idoralar va hokimliklar ishini baholashda bosh mezon bo‘ladi, dedi Shavkat Mirziyoyev.

Shuningdek, mahallaning nufuzini, uning resurs va imkoniyatlarini oshirish, xodimlarining moddiy ta’minotini yaxshilash bo‘yicha dastur ishlab chiqish zarur.

2020-yilda tumanlar byudjetiga qo‘shimcha manbalarning kamida 10 foizini bevosita mahalladagi muammolarni hal etishga sarflash bo‘yicha ishlarni boshlab, bu maqsadlarga 70 milliard so‘m ajratildi. Endi bu vakolatni yanada kengaytirib, tuman byudjeti xarajatlarining 5 foizini ham ana shunday maqsadlarga yo‘naltirish bo‘yicha yangi tartib joriy etiladi.

“Bu yangi eksperiment orqali birgina G‘ijduvon tumanida 8 milliard so‘m, yoki Farg‘ona shahrida 11 milliard so‘m mablag‘ aynan aholi dolzarb deb hisoblaydigan muammolarni hal etish uchun sarflanadi”, — deya izohladi Shavkat Mirziyoyev.

Mahalla raisi va uning o‘rinbosarlari vakolatlarini kengaytirib, ularga aholi muammolarini bevosita hal qilish imkonini yaratish kerak, dedi davlat rahbari. Bunda, mahalla raisiga mahalliy kengash majlisida ko‘rilishi majburiy bo‘lgan masalalarni kiritish huquqini berish lozim. Bu, ta’kidlanishicha, muammolarni tezkor hal qilishga imkon beradi.

Mahallada ishlayotgan malakali va tashabbuskor kadrlarni, davlat idoralari rahbarlik lavozimlariga tavsiya etish tizimi yo‘lga qo‘yiladi.

Shu munosabat bilan Shavkat Mirziyoyev parlament va hukumatga 2021-yil 1-aprelgacha mahalliy ijro va vakillik organlari hamda mahalla instituti faoliyatini tubdan takomillashtirishga oid yangi qonun loyihalarini ishlab chiqish haqida topshiriq berdi. “Ushbu hujjatlarda, hokimlar, ularning o‘rinbosarlari va maslahatchilarining vakolat chegarasi, vazifa va funksiyalari aniq belgilanishi lozim”, — dedi Prezident.