Маҳалладаги аҳвол вазирлик, идоралар ва ҳокимликлар ишини баҳолашда бош мезон бўлади — Шавкат Мирзиёев

Ўзбекистонда маҳаллий ҳокимлик ва кенгашлар бундан 27 йил аввал қабул қилинган қонун асосида ишламоқда. Президент Шавкат Мирзиёевнинг таъкидлашича, бу ҳужжат «бугунги ислоҳотларимиз талабларига мутлақо жавоб бермайди», шу боис «уни тубдан янгилаш зарур».

Давлат раҳбарининг қайд этишича, «ислоҳотларимиз натижалари, бўлаётган ўзгаришлар ва аҳолининг кайфияти аввало маҳаллада сезилади». Бундан буён, маҳалладаги ишларнинг аҳволи вазирлик, идоралар ва ҳокимликлар ишини баҳолашда бош мезон бўлади, деди Шавкат Мирзиёев.

Шунингдек, маҳалланинг нуфузини, унинг ресурс ва имкониятларини ошириш, ходимларининг моддий таъминотини яхшилаш бўйича дастур ишлаб чиқиш зарур.

2020 йилда туманлар бюджетига қўшимча манбаларнинг камида 10 фоизини бевосита маҳалладаги муаммоларни ҳал этишга сарфлаш бўйича ишларни бошлаб, бу мақсадларга 70 миллиард сўм ажратилди. Энди бу ваколатни янада кенгайтириб, туман бюджети харажатларининг 5 фоизини ҳам ана шундай мақсадларга йўналтириш бўйича янги тартиб жорий этилади.

«Бу янги эксперимент орқали биргина Ғиждувон туманида 8 миллиард сўм, ёки Фарғона шаҳрида 11 миллиард сўм маблағ айнан аҳоли долзарб деб ҳисоблайдиган муаммоларни ҳал этиш учун сарфланади», — дея изоҳлади Шавкат Мирзиёев.

Маҳалла раиси ва унинг ўринбосарлари ваколатларини кенгайтириб, уларга аҳоли муаммоларини бевосита ҳал қилиш имконини яратиш керак, деди давлат раҳбари. Бунда, маҳалла раисига маҳаллий кенгаш мажлисида кўрилиши мажбурий бўлган масалаларни киритиш ҳуқуқини бериш лозим. Бу, таъкидланишича, муаммоларни тезкор ҳал қилишга имкон беради.

Маҳаллада ишлаётган малакали ва ташаббускор кадрларни, давлат идоралари раҳбарлик лавозимларига тавсия этиш тизими йўлга қўйилади.

Шу муносабат билан Шавкат Мирзиёев парламент ва ҳукуматга 2021 йил 1 апрелгача маҳаллий ижро ва вакиллик органлари ҳамда маҳалла институти фаолиятини тубдан такомиллаштиришга оид янги қонун лойиҳаларини ишлаб чиқиш ҳақида топшириқ берди. «Ушбу ҳужжатларда, ҳокимлар, уларнинг ўринбосарлари ва маслаҳатчиларининг ваколат чегараси, вазифа ва функциялари аниқ белгиланиши лозим», — деди Президент.