BMT bosh kotibi Antonio Guterrish 2021-yilni koronavirus pandemiyasi oqibatidan xalos bo‘lishga bag‘ishlashga chaqirdi. Bu haqda bosh kotibning yangi yilgi videomurojaatida aytilgan, deb yozmoqda “RBK”.
“Kelinglar, o‘zaro va tabiat bilan murosaga kelib, iqlim inqirozini yengamiz. COVID-19 tarqalishini to‘xtatib, 2021-yilni tiklanish yili qilamiz”, — degan Guterrish.
U gap pandemiya oqibatlarini tugatish, “qulagan iqtisodiyot va jamiyatni” rivojlantirish, bo‘linishlarni bartaraf etish va “sayyoramizni tiklash uchun harakatni boshlash” haqida ketayotganini qayd etgan.
Uning so‘zlariga ko‘ra, yakunlayotgan yil sinov, fojia va ko‘z yoshlar keltirdi. Koronavirus pandemiyasi odamlar hayotini tubdan o‘zgartirdi, dunyoda kambag‘allik, tengsizlik va ochlik darajasi o‘sib bormoqda.
Avvalroq Ipsos Predictions tomonidan olib borilgan so‘rovnomalar COVID-19 pandemiyasi bilan bog‘liq inqiroz tugaganidan keyin yaxshi hayot boshlanishiga rossiyaliklarning atigi 22 foizi ishonishi va 70 foizi bunga shubha qilishini ko‘rsatgan. Shimoliy Amerika va Yevropada ham shunday kayfiyat hukmron. Shu bilan birga, Hindistondagi respondentlar ko‘proq optimistik ruhda ekanligi aniqlandi. U yerda so‘rovnomada ishtirok etganlarning 62 foizi dunyoning yaxshi tomonga o‘zgarishiga ishonadi.
So‘rovnoma 30 ga yaqin mamlakatda o‘tkazilgan. Istisnosiz barcha mamlakatlarda respondentlarning aksariyati 2020-yil shaxsan ular va yaqinlari uchun yomon yil bo‘lganligini bildirgan.
Izoh (0)