AQSh bosh infeksionisti Yangi yildan keyin koronavirus bilan bog‘liq vaziyat yomonlashishini taxmin qildi

AQShda koronavirus bilan bog‘liq vaziyat Yangi yil bayramlaridan keyin yomonlashishi mumkin. Bu haqda mamlakat bosh infeksionisti Entoni Fauchi CNN telekanali efirida aytib o‘tdi, deb yozadi “RBK”.

“Biz mavsumdan keyingi, ya’ni Rojdestvodan keyingi, Yangi yildan keyingi avj nuqta bilan to‘qnashishimiz ehtimoli katta. Men buni avj nuqtadan keyingi avj nuqta deb atagan bo‘lardim”, — dedi Fauchi.

Uning so‘zlariga ko‘ra, mamlakat kasallikka qarshi kurashda “nozik nuqtada” turibdi va yaqin bir-ikki hafta ichida vaziyat yomonlashishi mumkin. Uning ta’kidlashicha, ommaviy immunitet hosil qilish uchun aholining 80-85 foizida virusga nisbatan barqarorlikka erishish zarur.

O‘tgan hafta AQSh saylangan prezidenti Jo Bayden pandemiyaning “eng og‘ir kunlari” hali oldinda ekanligini aytib, amerikaliklarni kurashga tayyorlanishga chaqirgan edi. Shuningdek, u joriy prezident Donald Trampni pandemiyaga qarshi kurashda yetarlicha harakat qilmaganligi uchun tanqid qildi. Trampning o‘zi esa bir necha kun avval koronavirusga qarshi cheklov choralari jamiyatga virusning o‘zidan ham ko‘proq zarar yetkazishini aytgandi. “Demokratlar tomonidan boshqarilayotgan shtatlarda karantin ko‘plab odamlarning hayotini butunlay vayron qilmoqda. Bu Xitoy virusining (Tramp koronavirusni shunday ataydi) o‘zi yetkazadigan zarardan battarroq”, — dedi u.

AQShda koronavirusni yuqtirib olganlar soni 19,3 millionga yetgan. 335 mingga yaqin odam vafot etgan. Mamlakatda qariyb 2 million kishi koronavirusga qarshi emlangan, vaksinatsiya nuqtalarida 10 million doza dori turibdi.