БМТ бош котиби Антонио Гутерриш 2021 йилни коронавирус пандемияси оқибатидан халос бўлишга бағишлашга чақирди. Бу ҳақда бош котибнинг янги йилги видеомурожаатида айтилган, деб ёзмоқда «РБК».
«Келинглар, ўзаро ва табиат билан муросага келиб, иқлим инқирозини енгамиз. COVID-19 тарқалишини тўхтатиб, 2021 йилни тикланиш йили қиламиз», — деган Гутерриш.
У гап пандемия оқибатларини тугатиш, «қулаган иқтисодиёт ва жамиятни» ривожлантириш, бўлинишларни бартараф этиш ва «сайёрамизни тиклаш учун ҳаракатни бошлаш» ҳақида кетаётганини қайд этган.
Унинг сўзларига кўра, якунлаётган йил синов, фожиа ва кўз ёшлар келтирди. Коронавирус пандемияси одамлар ҳаётини тубдан ўзгартирди, дунёда камбағаллик, тенгсизлик ва очлик даражаси ўсиб бормоқда.
Аввалроқ Ipsos Predictions томонидан олиб борилган сўровномалар COVID-19 пандемияси билан боғлиқ инқироз тугаганидан кейин яхши ҳаёт бошланишига россияликларнинг атиги 22 фоизи ишониши ва 70 фоизи бунга шубҳа қилишини кўрсатган. Шимолий Америка ва Европада ҳам шундай кайфият ҳукмрон. Шу билан бирга, Ҳиндистондаги респондентлар кўпроқ оптимистик руҳда эканлиги аниқланди. У ерда сўровномада иштирок этганларнинг 62 фоизи дунёнинг яхши томонга ўзгаришига ишонади.
Сўровнома 30 га яқин мамлакатда ўтказилган. Истисносиз барча мамлакатларда респондентларнинг аксарияти 2020 йил шахсан улар ва яқинлари учун ёмон йил бўлганлигини билдирган.
Изоҳ (0)