AQSh Kongressining vakillar palatasi ko‘pchilik ovoz bilan pandemiya sharoitida iqtisodiyotni qo‘llab-quvvatlash choralaridan biri sifatida AQShning aksariyat fuqarolariga beriladigan to‘g‘ridan to‘g‘ri to‘lovlar miqdorini oshirish haqidagi tashabbusni yoqlab chiqdi. Bu haqda Meduza xabar bermoqda.
CNBC xabariga ko‘ra, summani oshirishni yoqlab 274 kishi ovoz bergan, 134 kishi qarshi chiqqan. Boshidan tashabbusni qo‘llab-quvvatlagan Demokratlar partiyasi vakillari safiga Respublikachilar partiyasining 44 a’zosi qo‘shilgan (yana 130 respublikachi qarshi ovoz bergan).
Endi qonun loyihasi ko‘rib chiqish uchun senatga yuboriladi, u esa Respublikachilar partiyasi vakillari tomonidan boshqariladi. Associated Press qayd etishicha, senatda ovoz berish natijalari qanday bo‘lishi “juda noaniq”. Senatdagi ozchilik yetakchisi Chak Shumer ovoz berishni talab qilishini aytdi.
Avvalroq AQSh Kongressi koronavirus tarqalishi fonida iqtisodiyotni qo‘llab-quvvatlashga qaratilgan 892 milliard dollarlik yangi paket loyihasini ma’qullagan edi. Paket aksariyat amerikaliklarga 600 dollar miqdorida to‘lovlar, shuningdek, ishsiz qolganlarga haftalik 300 dollar miqdorida qo‘shimcha to‘lovlarni o‘z ichiga olgan.
Eslatib o‘tamiz, mart oxirida AQSh Kongressi Senati COVID-19 koronavirus pandemiyasi sharoitida AQSh kompaniyalari, aholisi va sog‘liqni saqlash tizimini iqtisodiy qo‘llab-quvvatlash chora-tadbirlari to‘g‘risidagi qonun loyihasini bir ovozdan ma’qullab, 2,2 trillion dollar miqdorida mablag‘ ajratgan, ushbu moliyalashtirish paketi mamlakat tarixidagi eng yirigi bo‘lgandi. Aprel oyida esa Kongress iqtisodiyotni qo‘llab-quvvatlashga yana 484 milliard dollar ajratish to‘g‘risidagi dasturni ma’qullagandi. Bahorda tasdiqlangan ko‘plab choralar muddati tez orada tugaydi va yangi chora-tadbirlar paketi ularni uzaytirishni nazarda tutadi.
Avvalroq AQSh Moliya vazirligi iqtisodiyotni kuchaytirishga 916 milliard dollar ajratishni taklif qilgani, mamlakatda shatdaunning oldini olish uchun bir kunga budjet qabul qilingani haqida xabar berilgan edi.
Izoh (0)