Argentina prezidenti vaksinalar atrofidagi savdo va geosiyosiy bahs haqida gapirdi

Argentina prezidenti Alberto Fernandez koronavirus pandemiyasi chog‘ida ba’zi vaksinalarning boshqa kuchlar tomonidan obro‘sizlantirish holatlari uchrayotganini aytdi. Uning fikricha, mamlakatga yetkazib berilgan “Sputnik V” vaksinasi “savdo urushi” va “geosiyosiy bahs” obyektiga aylangan. Bu haqda “Kommersant” xabar bermoqda.

“Hisobga olish kerak bo‘lgan birinchi narsa shuki, savdo urushi boshlandi. Bundan tashqari, dunyo vaksinani qo‘lga kiritishga tashna bo‘lgani sababli uni kim taqdim etishi haqida geosiyosiy bahs olib borilmoqda”, — dedi Fernandez Televisin Publica’ga bergan intervyusida. Uning fikricha, “Sputnik V” ishlab chiqaruvchisi — Gamaleya nomidagi markaz bilan aynan shu narsa sodir bo‘lgan.

Argentinada vaksinatsiya 29-dekabrda boshlanadi. Buenos-Ayres provinsiyasida emlanish uchun 315 kishi ro‘yxatdan o‘tgan. Birinchi bosqichda faqat tibbiyot xodimlari emlanishi mumkin, keyinroq dasturga ta’lim va huquq-tartibot organlari xodimlari, shuningdek, 60 yoshdan oshgan va surunkali kasalliklari bo‘lgan odamlar ham kiritiladi.

Avvalroq Yevroittifoq tashqi siyosiy xizmati rahbari Jozep Borrel Rossiya davlat tomonidan nazorat qilinadigan OAVlar orqali G‘arbdagi vaksina ishlab chiquvchilar haqida dezinformatsiya tarqatayotganini aytgan edi. Uning fikricha, dezinformatsiya “Rossiya o‘zining Sputnik V vaksinasini sotishni xohlagan” mamlakatlarga qaratilgan.

Eslatib o‘tamiz, Argentina Rossiyada yaratilgan koronavirusga qarshi “Sputnik V” vaksinasini ro‘yxatdan o‘tkazdi. Vaksina Rossiyada o‘tkazilgan klinik tadqiqotlar asosida va Argentinaning o‘zida qo‘shimcha sinovlarsiz, tezlashtirilgan jarayon doirasida ma’qullangan.