2021-yil fevralida 5 nafar o‘zbekistonlik ilk bora Yaponiyaga qonuniy ishga yuboriladi

Bandlik va mehnat munosabatlari vazirligi huzuridagi “Ishga marhamat” monomarkazi kasbiy maktab bitiruvchilarining 5 nafari ilk marotaba Yaponiya davlatiga qonuniy tarzda ishga yuboriladi. Bu haqda 28-dekabr kuni monomarkazda bo‘lib o‘tgan matbuot anjumanida Bandlik va mehnat munosabatlari vaziri birinchi o‘rinbosari Erkin Muxitdinov ma’lum qildi.

Yaponiyaga O‘zbekiston fuqarolarini ishga yuborish maqsadida bundan bir yil oldin, 2019-yil 28-dekabrdagi “O‘zbekiston Respublikasi va Yaponiya o‘rtasida ikki tomonlama hamkorlikni yanada kengaytirish va mustahkamlash chora-tadbirlari to‘g‘risida”gi Prezident qarori qabul qilingan edi.

Qaror ijrosini ta’minlash maqsadida, “Ishga marhamat” monomarkazida “Yapon  tili va kasbiy malaka testiga tayyorlov” maktabi ochilgan va bir qancha fuqarolarga yapon tili hamda kasb-hunar o‘rgatilgan. Ushbu maktab bitiruvchilaridan 5 nafari 2020-yil fevral oyida Yaponiyaning qariyalar uyida ishlash uchun tanlab olindi.

“Bandlik va mehnat munosabatlari vazirligi tomonidan 2020-yil davomida aholini kasb-hunarga o‘qitish, ishsiz fuqarolarni tadbirkorlikka jalb qilish, ularning mehnat faolligini oshirish va kasb hunarga qayta o‘rgatish bo‘yicha bir qancha ishlar olib borildi. Ayni paytda ishsiz fuqarolarimiz uchun o‘zimizda ish o‘rni kamligi uchun migratsiya tizimini ham rivojlantirishimiz kerak. Shu maqsadda Yaponiya davlati bilan ham shartnoma qilib, bir qancha kasb yo‘nalishlari bo‘yicha fuqarolarimizni ishga yubormoqdamiz”, – dedi Erkin Muxitdinov.

Ta’kidlanishicha, ikki davlat o‘rtasida tartibli va xavfsiz mehnat migratsiyasida hamkorligini yo‘lga qo‘yish uchun avvalambor, Yaponiyada mehnat faoliyatini amalga oshirish istagida bo‘lgan fuqarolarga O‘zbekiston hududida yapon standartlariga mos keladigan boshlang‘ich darajadagi yapon tilini o‘qitish, zarur bo‘lgan kasblarga tayyorlash zarur.

“Yapon  tili va kasbiy malaka testiga tayyorlov” markazi orqali Yaponiyaga qonuniy ishga ketmoqchi bo‘lgan fuqarolar bir qancha talablarga javob berishi kerak. Ya’ni ushbu markazda malaka oshirish, Yapon tili JLPT N4 darajasini qo‘lga kiritish, viza olish uchun test topshirish, ish beruvchi bilan suxbatga tayyorlanish kerak bo‘ladi. Kurslar 6 oy davom etib, bir haftada 5 kun Yapon mutaxassislaridan ta’lim olishadi”, – dedi markaz rahbari Dilafruz Ikromova.

Malum qilinishicha, bugungi kunda mingdan ortiq O‘zbekiston fuqarosi Yaponiyada ishlash uchun o‘z istagini bildirgan. Mazkur davlatning sanoat, qurilish, qishloq xo‘jaligi va uy xo‘jaligi sohalari bo‘yicha 345 mingta xorijiy ishchiga ehtiyoji mavjud.