Бандлик ва меҳнат муносабатлари вазирлиги ҳузуридаги «Ишга марҳамат» мономаркази касбий мактаб битирувчиларининг 5 нафари илк маротаба Япония давлатига қонуний тарзда ишга юборилади. Бу ҳақда 28 декабрь куни мономарказда бўлиб ўтган матбуот анжуманида Бандлик ва меҳнат муносабатлари вазири биринчи ўринбосари Эркин Мухитдинов маълум қилди.
Японияга Ўзбекистон фуқароларини ишга юбориш мақсадида бундан бир йил олдин, 2019 йил 28 декабрдаги «Ўзбекистон Республикаси ва Япония ўртасида икки томонлама ҳамкорликни янада кенгайтириш ва мустаҳкамлаш чора-тадбирлари тўғрисида»ги Президент қарори қабул қилинган эди.
Қарор ижросини таъминлаш мақсадида, «Ишга марҳамат» мономарказида «Япон тили ва касбий малака тестига тайёрлов» мактаби очилган ва бир қанча фуқароларга япон тили ҳамда касб-ҳунар ўргатилган. Ушбу мактаб битирувчиларидан 5 нафари 2020 йил февраль ойида Япониянинг қариялар уйида ишлаш учун танлаб олинди.
«Бандлик ва меҳнат муносабатлари вазирлиги томонидан 2020 йил давомида аҳолини касб-ҳунарга ўқитиш, ишсиз фуқароларни тадбиркорликка жалб қилиш, уларнинг меҳнат фаоллигини ошириш ва касб ҳунарга қайта ўргатиш бўйича бир қанча ишлар олиб борилди. Айни пайтда ишсиз фуқароларимиз учун ўзимизда иш ўрни камлиги учун миграция тизимини ҳам ривожлантиришимиз керак. Шу мақсадда Япония давлати билан ҳам шартнома қилиб, бир қанча касб йўналишлари бўйича фуқароларимизни ишга юбормоқдамиз», – деди Эркин Мухитдинов.
Таъкидланишича, икки давлат ўртасида тартибли ва хавфсиз меҳнат миграциясида ҳамкорлигини йўлга қўйиш учун авваламбор, Японияда меҳнат фаолиятини амалга ошириш истагида бўлган фуқароларга Ўзбекистон ҳудудида япон стандартларига мос келадиган бошланғич даражадаги япон тилини ўқитиш, зарур бўлган касбларга тайёрлаш зарур.
«Япон тили ва касбий малака тестига тайёрлов» маркази орқали Японияга қонуний ишга кетмоқчи бўлган фуқаролар бир қанча талабларга жавоб бериши керак. Яъни ушбу марказда малака ошириш, Япон тили JLPT N4 даражасини қўлга киритиш, виза олиш учун тест топшириш, иш берувчи билан сухбатга тайёрланиш керак бўлади. Курслар 6 ой давом этиб, бир ҳафтада 5 кун Япон мутахассисларидан таълим олишади», – деди марказ раҳбари Дилафруз Икромова.
Малум қилинишича, бугунги кунда мингдан ортиқ Ўзбекистон фуқароси Японияда ишлаш учун ўз истагини билдирган. Мазкур давлатнинг саноат, қурилиш, қишлоқ хўжалиги ва уй хўжалиги соҳалари бўйича 345 мингта хорижий ишчига эҳтиёжи мавжуд.
Мавзуга доир:
- Япония мамлакатда коронавируснинг янги тури аниқлангани сабабли ўз чегараларини ёпди
- Наманган вилояти ҳокими: Четда юрган мигрантларга «келинглар» деб қуруқ даъват қилиш ниятимиз йўқ
- Ойига 200 доллардан кам пул юбораётган меҳнат муҳожирларини Ўзбекистонга қайтариш топшириғи берилган — Уйчи тумани ҳокими
Изоҳ (0)