Toshkent xalqaro aeroportida COVID-19 kasalligini aniqlashda PZR-test ma’lumotnomalarini soxtalashtirib, yo‘lovchilarga sotish bilan shug‘ullanuvchi shaxslar faoliyatiga chek qo‘yildi. Bu haqda Davlat xavfsizligi xizmati “Daryo”ga xabar qildi.
Qayd etilishicha, O‘zbekiston DXX hamda IIV xodimlari tomonidan o‘tkazilgan tezkor tadbir davomida Toshkent–Moskva yo‘nalishi bo‘yicha uchayotgan Buxoro viloyati Jondor tumanida yashovchi 4 nafar fuqaroning hujjatlari tekshirilib, ulardan soxta PZR-test ma’lumotnomalari olib qo‘yildi.
Dastlabki surishtiruv harakatlari natijasida mazkur shaxslar COVID-19 kasalligini aniqlash bo‘yicha test topshirmasdan, ushbu soxta ma’lumotnomalarni 1992-yil Buxoro viloyatida tug‘ilgan Q.E. va 1991-yil Xorazm viloyatida tug‘ilgan M.M.dan sotib olganini ma’lum bo‘ldi.
O‘z navbatida Q.E. va M.M.ga soxta ma’lumotnomalarni Toshkent shahrida yashovchi 1989-yilda tug‘ilgan M.N. va 1977-yilda tug‘ilgan K.A. tayyorlab, yetkazib turgan.
Hozirda mazkur holat yuzasidan jinoyat ishi qo‘zg‘atilgan.
Avvalroq Namanganda 50 ming va 100 ming so‘mlik kupyuralarni qalbakilashtirganlar, Sardobada 4 gektar yerni poliz ekinlarini ekishga ajratib bergani uchun 20 million so‘m pora olgan uyushma raisi hamda Bo‘stonliqdagi 1 gektar yerni rasmiylashtirib berish uchun 160 ming dollar talab qilgan shaxs qo‘lga olingani haqida xabar berilgandi.
Izoh (0)