O‘zbekistonda yil yakuni bo‘yicha jalb etilgan to‘g‘ridan to‘g‘ri xorijiy investitsiyalar hajmi avvalgi yildagiga nisbatan oshib, 6,6 milliard dollarga yetishi va eksport ko‘rsatkichi 15,1 milliard dollar miqdorida bo‘lishi prognoz qilinmoqda. Spot’ning yozishicha, bu ma’lumotlar Investitsiya va tashqi savdo vazirligi matbuot xizmati tomonidan keltirilgan.
Dunyoda to‘g‘ridan to‘g‘ri xorijiy investitsiyalar miqdorining 40 foizga pasayishi va 2020-yilda jahon savdosi hajmining 25 foizga kamayganiga qaramay, mamlakatda yirik investitsiya loyihalar ishga tushirilgan.
“Kelgusi yilda 7,5 milliard dollarlik to‘g‘ridan to‘g‘ri xorijiy investitsiyalarni jalb qilish va eksport hajmini 17 milliard dollarga yetkazish rejalashtirmoqda. Bunda ustuvor soha eng yuqori iqtisodiy samaraga ega bo‘lgan iqtisodiyot sohasi bo‘ladi”, — deyiladi vazirlik xabarida.
Buning uchun milliy eksportchilar bilan ishlashda quyidagi yo‘nalish kuchaytiriladi:
- eksportdan oldin moliyalashtirish,
- mahalliy tovarlarni xalqaro elektron tijorat saytlarida joylashtirish va ro‘yxatdan o‘tkazish;
- o‘zbek brendlarini jahon bozorlariga olib chiqish.
Avvalroq pandemiya O‘zbekistonga kiritiladigan xorijiy investitsiyalar oqimini kamaytirgani haqida xabar berilgan edi.
Izoh (0)