Toshkent shahridagi Yunusobod metro liniyasi qurilishida sodir bo‘lgan favqulodda hodisa yuzasidan jinoyat ishi javobgarlik masalasi hal etilmasdan tugatilgan. Bu haqda Toshkent shahar prokuraturasiga tayanib “Gazeta.uz” xabar berdi.
Foto: “Daryo”
Eslatib o‘tamiz, 2019-yilning 18-dekabr kuni Yunusobod metrosining yangi qurilayotgan qismida tuproq ko‘chishi yuz bergan edi. Bir kundan ortiq davom etgan qidiruv-qutqaruv ishlari natijasida 6 kishining jasadi tuproq ostidan olib chiqildi. Halok bo‘lganlarning to‘rt nafari Qashqadaryodan, yana ikki nafari Samarqanddan edi.
Shahar prokuraturasining ma’lum qilishicha, fojia yuzasidan Jinoyat kodeksining 257-moddasi (mehnatni muhofaza qilish qoidalarini buzish) 2-qismi “a” bandi, 258-modda (tog‘-kon, qurilish yoki portlatish ishlari xavfsizligi qoidalarini buzish) 2-qismi “a” bandi bo‘yicha jinoyat ishi qo‘zg‘atilgan.
“Mas’ul shaxslar o‘zlariga nisbatan qo‘zg‘atilgan jinoiy ishni ayblilik to‘g‘risidagi masalani hal qilmay turib tugatishni so‘rab murojaat qilishgan. Shuningdek, ish beruvchi halokatda vafot etganlarning oila a’zolariga yetkazilgan zararni qoplagan va ular tomonidan e’tirozlar mavjud emas. ‘O‘zbekiston temiryo‘llari’ AJ boshqaruvining yuqoridagi xodimlarga bergan ijobiy tavsifnomasini inobatga olgan holda 18-mart kuni Jinoyat protsessual kodeksining 84-moddasi (ayblilik to‘g‘risidagi masalani hal qilmay turib jinoyat ishini tugatish uchun asoslar) 5-qism 2-bandiga asosan jinoyat ishi tugatildi”, — deyiladi prokuratura xabarida.
Ekspertizasi xulosasiga ko‘ra, Yunusobod metrosi bekatining tunneli o‘ng tomonining temir-beton konstruksiyasi qulab tushganiga tunnelni ochiq usulda kovlashda texnik xavfsizlik qoidalarining buzilganligi va qurilish ishlarining sifatsiz bajarilganligi sabab bo‘lgan. Bu mas’ul shaxslarning jarayonni yetarlicha nazorat qilmaganligi natijasida sodir bo‘lgan.
Mas’ul shaxslar:
- “Ko‘prik qurilish invest” UK 67-raqamli qurilish otryadi boshlig‘ining o‘rinbosari Otabek Alimov;
- otryad ish yurituvchisi Saidbek Bobojonov;
- otryadning qurilish bo‘yicha ustasi Salohiddin Ashurov;
- “Toshkent metropoliteni” UKning “Toshkent metropoliteni liniyalarini qurish direksiyasi” ish yuritish bo‘limining qurilish-montaj ishlari bo‘yicha bosh inspektori Bahodir Muhammadrahimov.
Dastlabki xabarlarda 250 metr kub tuproq ko‘chgani, ko‘chkiga davomiy yomg‘ir sabab bo‘lgani aytilgan edi. Baxtsiz hodisa munosabati bilan o‘sha kunning o‘zida bosh vazir o‘rinbosari Ochilboy Ramatov raisligida hukumat komissiyasi tuzilgan, pudratchi-quruvchi tashkilotlar tomonidan marhumlarning oila-a’zolari va yaqinlariga 100 million so‘mlik dastlabki tovon pullari to‘lab berilgan edi.
Hodisa yuzasidan Bosh prokuratura tomonidan Jinoyat kodeksining 257 va 258-moddalari bo‘yicha jinoyat ishi qo‘zg‘atilgan edi.
Aynan shu fojiadan so‘ng Yunusoboddagi metroning yangi bekatlari ochilishi 2019-yil oxiridan 2020-yil Navro‘ziga qoldirildi, Prezident Shavkat Mirziyoyev esa 2020-yilda o‘tkazilgan ilk yig‘ilishlarning birida qurilish sohasida mehnat muhofazasini kuchaytirish bo‘yicha ko‘rsatma berdi.
