«Ўзбекистон темир йўллари» Тошкент метросининг Юнусобод йўналиши қурилишида олти кишининг ўлимига сабаб бўлган авария бўйича тергов тафсилотларини маълум қилди.
Маълум қилинишича, қурилиш ишларининг бажарилиши устидан назоратни сусайтиргани учун ва бўйсунувчи корхоналарда ўлим билан якунланган гуруҳли бахтсиз ҳодисани келтириб чиқаргани учун «Кўприкқурилиш» трести менежери Қудрат Исаев 22 январь куни эгаллаб турган лавозимидан озод этилган.
Ҳодиса юзасидан Тошкент шаҳар прокуратураси томонидан Жиноят кодексининг 257-моддаси (меҳнатни муҳофаза қилиш қоидаларини бузиш) 2-қисми «а» банди, 258-модда (тоғ-кон, қурилиш ёки портлатиш ишлари хавфсизлиги қоидаларини бузиш) 2-қисми «а» банди бўйича жиноят иши қўзғатилган.
Текширув давомида «Ўзбекистон темир йўллари»нинг «Кўприкқурилиш» трести 67-сонли кўприк қурилиш экипажи бошлиғининг ўринбосари (қурилиш учун масъул) Отабек Алимов, отряд бошлиғи Саидбек Бобожонов, қурилиш ишлари бўйича отряд бригадаси Салоҳиддин Ашуров, «Тошкент метрополитени»нинг Метрополитен линияларини қуриш дирекцияси ишлаб чиқариш бўлимининг қурилиш-монтаж ишлари катта инспектори Баҳодир Муҳаммадраҳимов 257-модданинг 2-қисми «а» ва «б» бандларида (меҳнатни муҳофаза қилиш қоидаларини бузиш одам ўлими ва бошқа оғир оқибатлар келиб чиқишига сабаб бўлиши), 258-модданинг 2-қисм алоҳида инобатга олинган белгилар мавжудлиги аниқланган.
Бироқ улар илгари судланмаганликлари, марҳумларнинг оила аъзолари томонидан эътирозлар мавжуд эмаслиги, шунингдек, уларга берилган ижобий тавсифнома инобатга олиниб, юқорида қайд этилган шахсларга нисбатан жиноий иш тўхтатилган.
«Юнусобод йўналишининг янги бекатларида қурилиш ишлари 2020 йил июль ойида якунланиб, жорий йилнинг август ойи охирида фойдаланишга топширилди. Ушбу йўналиш фойдаланишга топширилган кундан бошлаб ҳеч қандай камчиликлар аниқланмаган, барча бекатлар ва метро туннеллари белгиланган меъёр ва стандартларга мувофиқ ишламоқда, йўловчилар томонидан эътироз ва шикоятлар келиб тушмаган», — деб таъкидланган «Ўзбекистон темир йўллари» матбуот хизмати хабарида.
Нима бўлган эди?
2019 йил 18 декабрь куни соат 10:20 да Тошкент метрополитенининг Юнусобод линиясида қурилаётган янги бекат ҳудудида қазилган котлован ён томони ўпирилган.
Мазкур ҳолат тинимсиз ёғингарчиликлар сабабли содир бўлган. Ўзбекистон Гидрометеорология марказининг маълумотларига кўра, 2019 йилнинг 18 декабрь куни Тошкент шаҳрининг Юнусобод туманида соат 07:40 дан 15:50 гача ёғингарчилик миқдори 12 миллиметрни ташкил этиб, шаҳарнинг қолган ҳудудларига нисбатан кўпроқ бўлган. Воқеа оқибатида қулаб тушган тупроқ массаси қурилиш ишларига жалб этилган олти нафар ишчини босиб қолган.
Ўзбекистон Президенти фармойишига биноан тезкор равишда ҳодиса сабаблари ва оқибатларини ўрганиш, ерусти ва ерости метрополитени объектларида бундай ҳодисаларнинг олдини олиш бўйича зарур чора-тадбирларни амалга ошириш мақсадида ҳукумат комиссияси ташкил этилган.
19 декабрдаги қидирув-қутқарув ишлари натижасида юқорида қайд этилган барча ишчиларнинг жасадлари топилган.
Компенсация тўловлари
Қурбонларнинг оилаларига бирламчи товон пули сифатида 100 миллион сўмдан тўлаб берилган.
Кейинчалик ҳукумат комиссияси қарори билан вафот этган 5 нафар ишчиларнинг оилаларига 261,9 миллион сўмлик, шунингдек, яна бир вафот этган ходимнинг оиласига 281 миллион сўмлик бир марталик товон пули тўланган. Ушбу бир марталик тўловлар марҳумларнинг оилаларига тўлаб берилган. Ушбу маблағлардан ташқари, уларнинг оила аъзоларига ҳар ойда қуйидаги миқдорларда ойлик компенсациялар тўлаб борилмоқда:
- марҳум Диёров Анварнинг турмуш ўртоғи, бир ўғли ва икки қизига — 727,6 минг сўмдан;
- марҳум Абдуллаев Давроннинг пенсионер онасига — 1212,68 минг сўмдан ортиқ;
- марҳум Абдуллаев Ойбекнинг пенсионер ота ва онасига, шунингдек, ўғли ва қизига — 606,34 минг сўмдан;
- марҳум Равшанов Жонибекнинг нафақахўр отаси ва онаси, қизи ҳамда турмуш ўртоғига —519,72 минг сўмдан;
- марҳум Каримов Зариф Тўлқиновичнинг уч қизи, бир ўғли ва турмуш ўртоғига — 650,6 минг сўмдан.
Маълумот учун, экспертиза хулосасига кўра, метро бекати туннелининг темир-бетон конструкцияси қулаб тушганига туннелни очиқ усулда ковлашда техник хавфсизлик қоидаларининг бузилганлиги ва қурилиш ишларининг сифатсиз бажарилганлиги сабаб бўлган. Бу масъул шахсларнинг жараённи етарлича назорат қилмаганлиги натижасида содир бўлган.
Айнан шу фожиадан сўнг Юнусободдаги метронинг янги бекатлари очилиши 2019 йил охиридан 2020 йил Наврўзига қолдирилганди, Президент Шавкат Мирзиёев эса 2020 йилда ўтказилган илк йиғилишларнинг бирида қурилиш соҳасида меҳнат муҳофазасини кучайтириш бўйича кўрсатма берди.
Изоҳ (0)