Bir oy avval Chimboy tumani hokimi lavozimiga tayinlangan Aybek Tajyetdinov xizmatda foydalanish uchun Equinox (Mosaic Black Metallic) avtomobilini xarid qilmoqda.
Avval Vazirlar Kengashi raisining birinchi o‘rinbosari lavozimida, hozir esa Chimboy tumani hokimi bo‘lgan Aybek Tajyetdinov UzAuto Motors kompaniyasi tomonidan ishlab chiqarilgan Equinox rusumli mashinani 349 million so‘mga sotib olish bo‘yicha shartnomani 21-dekabr kuni imzolagan, deb xabar bermoqda “Kun.uz”.
Hokimlik yangi avtomobil xarididan ko‘zlangan maqsadni shartnomada ochiqlamagan. Shartnomaga ko‘ra, 10 kun ichida, 31-dekabr kuni Equinox egasiga yetkazib beriladi. Aybek Tajyetdinov egallab turgan lavozimiga 7-noyabr kuni kirishgandi.
Ma’lumot uchun, 12-noyabr kuni Qoraqalpog‘iston Respublikasi Jo‘qorg‘i Kengesi tomonidan qariyb 883 million so‘mga Toyota Prado, 11-dekabr kuni esa Qoraqalpog‘iston Sog‘liqni saqlash vaziri 311 million 124 ming 67 so‘mga Malibu-2 sotib olgandi.
Eslatib o‘tamiz, noyabr boshida Zarbdor tumani hokimi Zafar Ro‘ziyev Captiva xizmat mashinasi bo‘la turib, 370 million so‘mga Trailblazer, shuningdek, pandemiya davrida Uchqo‘rg‘on, Pop, Qo‘shrabot va Narpay tumanlari hokimliklari ham Trailblazer sotib olgani to‘g‘risida xabar berilgandi. Denov tumani hokimligi esa karantin kuchaytirilgan paytda — 2020-yilning iyulida 398 million so‘mga Trailblazer LTZ-AT, Namangan viloyati hokimligi ham iyulda budjet mablag‘lari hisobidan 1 milliard 579 million so‘mga Toyota LC200 avtomobilini hamda sentabr oyida qariyb 400 million so‘mga Trailblazer LTZ-AT rusumli avtomobil xarid qilgan.
Bundan tashqari, Mirzacho‘l tumani hokimligi 370 million so‘mga Trailblazer, Qashqadaryo viloyati hokimligi hokim o‘rinbosariga 349 million so‘mga Equinox, hokimning xotin-qizlar masalalari bo‘yicha maslahatchisiga, yordamchisi hamda ishlar boshqarmasi boshlig‘iga 621 million so‘mga 3 ta Tracker xizmat mashinalari sotib olgan.
Korrupsiyaga qarshi kurashish agentligi direktori Akmal Burhonov mansabdor shaxslar pandemiya sharoitida davlat mablag‘larining samarali sarflanishi naqadar muhim ekanligini to‘la anglab yetmayotgani, qimmat narxlardagi xizmat avtotransportlarini xarid qilinayotganiga munosabat ham bildirgan. Shuningdek, Prezidentning yangi qaroriga ko‘ra, tuman hokimlariga narxi 267,5 million so‘mdan yuqori xizmat avtomobili sotib olish taqiqlanishi mumkinligi ma’lum qilingandi.
Izoh (0)