Бир ой аввал Чимбой тумани ҳокими лавозимига тайинланган Айбек Тажетдинов хизматда фойдаланиш учун Equinox (Mosaic Black Metallic) автомобилини харид қилмоқда.
Аввал Вазирлар Кенгаши раисининг биринчи ўринбосари лавозимида, ҳозир эса Чимбой тумани ҳокими бўлган Айбек Тажетдинов UzAuto Motors компанияси томонидан ишлаб чиқарилган Equinox русумли машинани 349 миллион сўмга сотиб олиш бўйича шартномани 21 декабрь куни имзолаган, деб хабар бермоқда «Kun.uz».
Ҳокимлик янги автомобиль харидидан кўзланган мақсадни шартномада очиқламаган. Шартномага кўра, 10 кун ичида, 31 декабрь куни Equinox эгасига етказиб берилади. Айбек Тажетдинов эгаллаб турган лавозимига 7 ноябрь куни киришганди.
Маълумот учун, 12 ноябрь куни Қорақалпоғистон Республикаси Жўқорғи Кенгеси томонидан қарийб 883 миллион сўмга Toyota Prado, 11 декабрь куни эса Қорақалпоғистон Соғлиқни сақлаш вазири 311 миллион 124 минг 67 сўмга Malibu-2 сотиб олганди.
Эслатиб ўтамиз, ноябрь бошида Зарбдор тумани ҳокими Зафар Рўзиев Captiva хизмат машинаси бўла туриб, 370 миллион сўмга Trailblazer, шунингдек, пандемия даврида Учқўрғон, Поп, Қўшработ ва Нарпай туманлари ҳокимликлари ҳам Trailblazer сотиб олгани тўғрисида хабар берилганди. Денов тумани ҳокимлиги эса карантин кучайтирилган пайтда — 2020 йилнинг июлида 398 миллион сўмга Trailblazer LTZ-АТ, Наманган вилояти ҳокимлиги ҳам июлда бюджет маблағлари ҳисобидан 1 миллиард 579 миллион сўмга Toyota LC200 автомобилини ҳамда сентябрь ойида қарийб 400 миллион сўмга Trailblazer LTZ-АТ русумли автомобиль харид қилган.
Бундан ташқари, Мирзачўл тумани ҳокимлиги 370 миллион сўмга Trailblazer, Қашқадарё вилояти ҳокимлиги ҳоким ўринбосарига 349 миллион сўмга Equinox, ҳокимнинг хотин-қизлар масалалари бўйича маслаҳатчисига, ёрдамчиси ҳамда ишлар бошқармаси бошлиғига 621 миллион сўмга 3 та Tracker хизмат машиналари сотиб олган.
Коррупцияга қарши курашиш агентлиги директори Акмал Бурҳонов мансабдор шахслар пандемия шароитида давлат маблағларининг самарали сарфланиши нақадар муҳим эканлигини тўла англаб етмаётгани, қиммат нархлардаги хизмат автотранспортларини харид қилинаётганига муносабат ҳам билдирган. Шунингдек, Президентнинг янги қарорига кўра, туман ҳокимларига нархи 267,5 миллион сўмдан юқори хизмат автомобили сотиб олиш тақиқланиши мумкинлиги маълум қилинганди.
Изоҳ (0)