Futbol bo‘yicha Angliya Premyer Ligasining 15-turida “Arsenal” 26-dekabr, shanba kuni “Chelsi”ni qabul qildi.
Uchrashuv maydon egalarining faolligi bilan boshlandi, “to‘pchilar” dastlabki daqiqalardanoq xavfli vaziyatlar yaratishda raqibidan yaxshiroq harakat qildi. 35-daqiqada mezbonlar penalti ishlab oldi, uni Aleksander Lyakazett golga aylantirdi. Birinchi bo‘lim yakunlanishi arafasida “Arsenal” yana standart vaziyatdan to‘p kiritdi: Granit Jaka jarima zarbasini qoyilmaqom ijro etgan holda jamoasining ikkinchi golini urdi.
Ikkinchi bo‘lim ham Mikel Arteta shogirdlarining ustunligida boshlandi. 56-daqiqada Bukayo Saka jarima maydoniga yorib kirdi va to‘pni darvozabon ustidan oshirib, chiroyli golga muallif bo‘ldi. Hisob yirik ko‘rinishga kelgandan keyin ham mezbonlarda yana bir qator imkoniyatlar yuzaga keldi, biroq so‘nggi zarbalardagi noaniqlik va Eduard Mendining seyvlari “ko‘klar”ni muqarrar gollardan asrab qoldi.
O‘yin yakunlanishi arafasida mehmonlarning tezkor hujumini Temmi Abraham golga aylantirdi. Asosiy vaqtning so‘nggi daqiqasida “Chelsi” vakillari penalti ishlab oldi, biroq Jorjinyoning 11 metrlik nuqtadan yo‘llagan zarbasini darvozabon qaytarishga erishdi.
Ketma-ket yetti o‘yinlik g‘alabasiz seriyasiga chek qo‘ygan “Arsenal” ochkolarini 17 taga yetkazib olgan holda 14-o‘ringa ko‘tarildi. “Chelsi” (25) esa 6-pog‘onaga tushib ketdi.
“Aston Villa” o‘z uyida “Kristal Pelas”ni qabul qildi. O‘yinda tezkor gol urgan mezbonlar birinchi bo‘lim so‘ngida bir o‘yinchi kam bo‘lib qoldi. Shunday bo‘lsa-da, “Aston Villa” ikkinchi bo‘limda yana ikkita to‘p kiritgan holda londonliklarni yirik hisobda taslim etdi. Bu g‘alaba birmengemliklarni (25) 6-o‘ringa olib chiqdi.
APL
15-tur bahslari
26-dekabr, shanba
“Arsenal” — “Chelsi” 3:1
Gollar: 1:0 – 34, penalti Lyakazett, 2:0 – 44 Jaka, 3:0 – 56 Saka, 3:1 – 85 Abraham.“Arsenal”: Leno, Holding, Tirni, Mari, Belyerin, an-Nenni, Saka, Smit-Rou (Uillok, 65), Jaka, Martinelli (Pepe, 71), Lyakazett (Mustafi, 90).
“Chelsi”: Mendi, Zuma, Chiluell, Jeyms, Tiago Silva, Kovachich (Jorjinyo, 46), Maunt, Kante (Haverts, 74), Pulishich, Verner (Hadson-Odoi, 46), Abraham.
Ogohlantirishlar: Mari (16), Tiago Silva (73), Tirni (83).
“Fulhem” — “Sauthempton” 0:0
“Aston Villa” — “Kristal Pelas” 3:0
Gollar: 1:0 – 5 Traore, 2:0 – 66 Hoz, 3:0 – 76 al-G‘ozi.Chetlatish: Mingz (45) — “Aston Villa”.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)