Футбол бўйича Англия Премьер Лигасининг 15-турида «Арсенал» 26 декабрь, шанба куни «Челси»ни қабул қилди.
Учрашув майдон эгаларининг фаоллиги билан бошланди, «тўпчилар» дастлабки дақиқаларданоқ хавфли вазиятлар яратишда рақибидан яхшироқ ҳаракат қилди. 35-дақиқада мезбонлар пенальти ишлаб олди, уни Александер Ляказетт голга айлантирди. Биринчи бўлим якунланиши арафасида «Арсенал» яна стандарт вазиятдан тўп киритди: Гранит Жака жарима зарбасини қойилмақом ижро этган ҳолда жамоасининг иккинчи голини урди.
Иккинчи бўлим ҳам Микель Артета шогирдларининг устунлигида бошланди. 56-дақиқада Букайо Сака жарима майдонига ёриб кирди ва тўпни дарвозабон устидан ошириб, чиройли голга муаллиф бўлди. Ҳисоб йирик кўринишга келгандан кейин ҳам мезбонларда яна бир қатор имкониятлар юзага келди, бироқ сўнгги зарбалардаги ноаниқлик ва Эдуард Мендининг сейвлари «кўклар»ни муқаррар голлардан асраб қолди.
Ўйин якунланиши арафасида меҳмонларнинг тезкор ҳужумини Тэмми Абраҳам голга айлантирди. Асосий вақтнинг сўнгги дақиқасида «Челси» вакиллари пенальти ишлаб олди, бироқ Жоржиньонинг 11 метрлик нуқтадан йўллаган зарбасини дарвозабон қайтаришга эришди.
Кетма-кет етти ўйинлик ғалабасиз сериясига чек қўйган «Арсенал» очколарини 17 тага етказиб олган ҳолда 14-ўринга кўтарилди. «Челси» (25) эса 6-поғонага тушиб кетди.
«Астон Вилла» ўз уйида «Кристал Пэлас»ни қабул қилди. Ўйинда тезкор гол урган мезбонлар биринчи бўлим сўнгида бир ўйинчи кам бўлиб қолди. Шундай бўлса-да, «Астон Вилла» иккинчи бўлимда яна иккита тўп киритган ҳолда лондонликларни йирик ҳисобда таслим этди. Бу ғалаба бирменгемликларни (25) 6-ўринга олиб чиқди.
АПЛ
15-тур баҳслари
26 декабрь, шанба
«Арсенал» — «Челси» 3:1
Голлар: 1:0 – 34, пенальти Ляказетт, 2:0 – 44 Жака, 3:0 – 56 Сака, 3:1 – 85 Абраҳам.«Арсенал»: Лено, Ҳолдинг, Тирни, Мари, Бельерин, ан-Ненни, Сака, Смит-Роу (Уиллок, 65), Жака, Мартинелли (Пепе, 71), Ляказетт (Мустафи, 90).
«Челси»: Менди, Зума, Чилуэлл, Жеймс, Тиаго Сильва, Ковачич (Жоржиньо, 46), Маунт, Канте (Ҳаверц, 74), Пулишич, Вернер (Ҳадсон-Одои, 46), Абраҳам.
Огоҳлантиришлар: Мари (16), Тиаго Сильва (73), Тирни (83).
«Фулҳэм» — «Саутҳэмптон» 0:0
«Астон Вилла» — «Кристал Пэлас» 3:0
Голлар: 1:0 – 5 Траоре, 2:0 – 66 Ҳоз, 3:0 – 76 ал-Ғози.Четлатиш: Мингз (45) — «Астон Вилла».
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)