Shavkat Mirziyoyev so‘nggi 11 oyda yosh oilalar o‘rtasida qancha ajrim qayd etilganini ma’lum qildi

2018—2020-yillarda O‘zbekiston bo‘yicha 5 mingdan ziyod namunali yosh oilaga arzon uy-joylar qurilib, qariyb 200 milliard so‘m miqdorida boshlang‘ich badal pullari to‘lab berildi. Bu haqda 25-dekabr kuni bo‘lib o‘tgan O‘zbekiston yoshlari forumida ma’lum qilindi.

“Daryo” muxbiri Mirolim Isajonovning xabar berishicha, davlat rahbari yosh oilalar o‘rtasida kuzatilayotgan ajrimlar haqida ham so‘z yuritdi.

“Xalqimiz azaldan oilani muqaddas bilib, uni doimo asrab-avaylab keladi. Oila qanchalik mustahkam bo‘lsa, jamiyat ham shunchalik barqaror bo‘ladi. Bir narsani unutmasligimiz lozim: xonadonlarimizdagi tinchlik-totuvlik, avvalo, oiladagi sog‘lom muhitga, mustaqil hayot ostonasida turgan qizlarimizni oilaviy turmushga tayyorlash bilan bevosita bog‘liq. Afsuski, bu muhim masalaga loqaydlik va e’tiborsizligimiz natijasida joriy yilning o‘tgan 11 oyida yosh oilalar o‘rtasida 25 ming ajrimlar qayd etilgan. Bu salbiy holat barchamizni jiddiy bezovta qilishi va qattiq tashvishga solishi kerak albatta. Axir o‘zingiz o‘ylang, agar 25 ming oilaning har birida kamida uch nafardan a’zosi bo‘lsa, bu 100 ming nafar odam hayotining barbod etilgani emasmi? Buning oqibatida qanchadan-qancha begunoh bolalar tirik yetim bo‘lib qoladi, qancha insonlarning taqdiri izdan chiqib, sarson-sargardon bo‘ladi? Nega mana shu oilalarni saqlab qolish uchun mahallalarda harakat qilmadik, yoshlarga to‘g‘ri yo‘lni ko‘rsatmadik?”, — dedi Shavkat Mirziyoyev.

Prezident o‘z nutqida mahallama-mahalla yurish orqali 25 mingta oilaning kamida 5-10 mingtasini yarashtirish mumkinligini ta’kidladi.

“Men bugungi imkoniyatdan foydalanib, keng jamoatchilikka, avvalambor, ko‘pni ko‘rgan mo‘tabar nuroniylarimizga, oqila va mehribon onalarimizga murojaat etmoqchiman. Bu og‘riqli masalada bizga yordam beringlar, deb iltimos qilaman. Oilaviy nizolarning oldini olish, ajrimlarni kamaytirish borasida siz, aziz yoshlarimiz ham, tashabbus va faollik ko‘rsatsangiz, men barchangizdan cheksiz minnatdor bo‘lar edim.

Bugungi uchrashuvimizda “Nuroniy” jamg‘armasi raisi Sodiqjon Turdiyev va xotin-qizlar masalalari bo‘yicha mas’ul rahbar Gulnora Ma’rufova ham qatnashyapti. Sizlar mazkur masalaga oid o‘zlaringizni aniq taklif va rejalaringizni yoshlarga yetkazib, yigit-qizlar bilan muloqot qilsalaringiz hamda bu bo‘yicha o‘z tajribalaringizni amalga oshirib, befarq bo‘lmasalaringiz, katta ijobiy natijaga erishamiz. 25 mingta oilani ham mahallama-mahalla yurib, eng kamida 5-10 mingtasini yarashtirishimiz mumkin, men bunga ishonaman. Agar bunga befarq bo‘lmasak, ko‘proq yoshlarni eshitsak, qanchadan-qancha oilaga baxt, nur olib kirardik”, — davlat rahbari.