2020/2021-o‘quv yili uchun Axborot texnologiyalari va informatika fanini chuqurlashtirib o‘qitishga ixtisoslashtirilgan tayanch maktablarga ilk bor iqtidorli o‘quvchilarni qabul qilish bo‘yicha kvotalar tasdiqlandi. Bu haqda Xalq ta’limi vazirligi xabar berdi.
Ma’lum qilinishicha, ayni vaqtda barcha tayanch maktablarda qabul komissiyalari tashkil etilgan va saralash tanlovida ishtirok etadigan talabgorlarning hujjatlari qabul qilinmoqda. Hujjatlarni elektron platforma orqali ham onlayn topshirish mumkin.
2021-yilning yanvar oyi boshida Xalq ta’limi, Axborot texnologiyalari va kommunikatsiyalarini rivojlantirish vazirliklari hamda Davlat test markazi bilan birgalikda tasdiqlangan qabul kvotalari asosida respublika bo‘yicha tashkil etiladigan 12 ta axborot texnologiyalari va informatika yo‘nalishidagi tayanch maktablarga iqtidorli o‘quvchilarni saralab olish bo‘yicha tanlovlar o‘tkaziladi.
Ushbu tayanch maktablarda tahsil olish uchun 540 nafar iqtidorli o‘quvchi 2021-yilning yanvar oyida Davlat test markazi tomonidan o‘tkaziladigan saralash test sinovlari asosida saralab olinadi. Eng munosib hamda iqtidorli o‘quvchilar 2020/2021-yilning 2-yarim yilligidan boshlab axborot texnologiyalari va informatika yo‘nalishidagi tayanch maktablarda ta’lim olishni boshlaydi.
“Tanlov haqida qo‘shimcha ma’lumotlarni tayanch maktablarning qabul komissiyasiga murojat etgan holda olishingiz mumkin”, — deyiladi xabarda.
Eslatib o‘tamiz, Toshkent shahri va Farg‘ona viloyatida mazkur yo‘nalishdagi maktablar tashkil etilganligi sababli ularga o‘quvchilar qabuli 2020/2021-o‘quv yili boshida o‘tkazilgan. Bugungi kunda ushbu maktablarda 120 nafar 5-sinf o‘quvchilari axborot texnologiyalari va informatika yo‘nalishida tahsil olmoqda.
Ma’lumot uchun: Axborot texnologiyalari va informatika fanini chuqurlashtirib o‘qitishga ixtisoslashtirilgan tayanch maktablari O‘zbekiston Prezidentining “Axborot texnologiyalari sohasida ta’lim tizimini yanada takomillashtirish, ilmiy tadqiqotlarni rivojlantirish va ularni IT-industriya bilan integratsiya qilish chora-tadbirlari to‘g‘risida” 2020-yil 6-oktabrdagi qaroriga asosan tashkil qilingan.
Izoh (0)