Qozog‘istonliklar koronavirus tufayli kiritilgan cheklovlar ustidan yana sudga murojaat qildi

Qozog‘istonning Nur-Sulton shahar apellyatsiya sudi sanitariya qoidalari orqali kiritilgan cheklovlar aholining konstitutsiyaviy huquqlariga zid kelishi va sog‘liqni saqlash vaziri ularni tasdiqlash uchun huquqqa ega emasligi yuzasidan shikoyat qilgan bir guruh qozog‘istonliklarning da’volarini asossiz deb topdi. Bu haqda Tengrinews shahar sudi matbuot xizmatiga tayanib xabar bermoqda.

Avvalroq bir guruh fuqarolar poytaxtning Yesil tuman sudiga sog‘liqni saqlash vaziri buyrug‘i bilan tasdiqlangan sanitariya qoidalari bandlarini qonunga va Konstitutsiyaga zid deb topish haqidagi da’vo bilan murojaat qilgan edi. Birinchi instansiya sudi qozog‘istonliklarning shikoyatini qondirmagan edi.

“Da’vogarlar qaror ustidan Nur-Sulton shahar sudiga shikoyat qilib, individual himoya vositalari va antiseptiklardan foydalanish, shu jumladan, tibbiyot niqoblarini taqish va 65 yoshdan oshgan shaxslar uchun alohida cheklovlarni ko‘zda tutuvchi sanitariya qoidalari orqali kiritilgan cheklovlar fuqarolarning konstitutsiyaviy huquqlarini cheklashini hamda sog‘liqni saqlash vaziri ularni tasdiqlash uchun vakolatga ega emasligini iddao qilgan.

Apellyatsiya ko‘rsatilgan dalillarni asossiz deb topdi va birinchi instansiya sudi qarorini qonuniyligi va asosliligi uchun o‘zgarishsiz qoldirdi”, — deyiladi xabarda.

Eslatib o‘tamiz, 25-dekabrdan Qozog‘istonda koronavirus tufayli yangi cheklovlar kuchga kirdi. Xususan, tomosha, sport va boshqa ommaviy tadbirlar, shu jumladan, Yangi yil tadbirlari va bayram korporativlarini o‘tkazish taqiqlandi. Epidemiologik vaziyat barqarorlashgunicha Tengiz neft-gaz konida cheklov choralari kuchaytirildi hamda koronavirusga qarshi dori vositalarining chakana narxlari o‘rtacha 24 foizga pasaytirildi.

Bozorlarning ishlash vaqti soat 18:00 gacha, kinoteatrlarniki — 20:00 gacha qisqartiriladi, savdo-ko‘ngilochar markazlar va gipermarketlar soat 22:00 da yopiladi.

Jahon sog‘liqni saqlash tashkiloti ma’lumotlariga ko‘ra, Qozog‘istonda koronavirusga chalinganlar soni 193 503 kishiga yetgan. Shularning 2669 nafari vafot etgan. So‘nggi bir kecha-kunduzda 754 kishi virusni yuqtirgan.