Rossiya Tashqi ishlar vazirligining Moskvadagi bosh binosidan bir million dollardan ziyodroq pul yo‘qolgan, deb yozadi Meduza. Bu haqda “REN TV” telekanali hech qanday manbalarga tayanmagan holda xabar bergan. Hodisa bir yil oldin yuz bergan, ammo shu paytgacha bu haqda ma’lum bo‘lmagan.
Pul TIV valyuta-moliya departamenti yetakchi ekspert-mutaxassisi Natalya Agalsovaning kabinetidan yo‘qolgan. Buni 2019-yil 19-dekabrda, Agalsova yirik qiymatdagi pulni bankka topshirishi kerak bo‘lgan kuni payqab qolishgan.
Bundan 20 kun avval u bir yarim million dollarni Rossiyaning Erondagi elchixonasidan olgan. Bu konsullik xizmatlari uchun to‘lov bo‘lgan. Elchixona AQShning Eronga qarshi sanksiyalari tufayli pulni bank o‘tkazmasi orqali yubora olmagan, shu sababli u Rossiyaga diplomatik pochta bilan jo‘natilgan. “REN TV” qayd etishicha, bunday amaliyot nafaqat Rossiya, balki boshqa mamlakatlar diplomatik muassasalari uchun ham xosdir. Bir yarim million dollar “Absolyut” arog‘idan bo‘shagan qutida yetib kelgan.
Pul bankka topshiriladigan kuni Agalsova boshlig‘iga qo‘ng‘iroq qilib, o‘zini yomon his qilayotgani va ishga kechroq kelishi haqida ogohlantirgan. Uning kabinetini ochib, yarmigacha naqd pul bilan to‘ldirilgan inkassator sumkasini topishdi. Taftish natijasida Agalsovaning kabinetida umumiy qiymatdan 1,066 million dollar kamomad aniqlangan. 16-dekabr kuni o‘tkazilgan avvalgi taftishda esa hamma pullar joyida bo‘lgan. Kuzatuv kameralari Agalsovaning 18-dekabr kuni kabinetdan ikkita “hajmdor paketlar” bilan chiqib ketganini ko‘rsatgan.
TIV xodimasi qo‘lga olingan. Uning so‘zlariga ko‘ra, 16-dekabr kuni unga bankka topshirish uchun 1,38 million dollar pulni tayyorlash buyurilgan. U “Absolyut”dan bo‘shagan qutini ochib, ko‘rsatmalarga qaramasdan, pulni bir o‘zi sanab chiqa boshlagan. Qutida 150 dasta 100 dollarlik kupyura bo‘lishi kerak edi. Biroq Agalsova iddao qilishicha, 100 dollarlik dastalar faqat tepa qatorda bo‘lgan; pastda esa puch dastalar bo‘lgan — ularning faqat birinchi qavatidagi kupyuralar 100 dollarlik bo‘lgan, qolgan hammasi esa bir dollarlik bo‘lgan.
Agalsova sarosimaga tushib qolganini va kamomadning bir qismini kassadagi pullar hisobidan, yana bir qismini esa o‘zining 200 ming dollar jamg‘armasi va uch million rubllik kredit hisobidan yopishga qaror qilganini aytdi. Ammo unga kredit berishmagan. 19-dekabr kuni ertalab u o‘zi birga yashagan Vasiliy Makovoz nomiga vasiyatnoma rasmiylashtirib, dala hovliga ketgan. U yerda, Agalsovaning so‘zlariga ko‘ra, u o‘z joniga qasd qilishga uringan, ammo bu muvaffaqiyatsiz bo‘lgan. Keyinroq u dala hovlida qo‘lga olingan.
Agalsova bilan birga Makovoz ham qo‘lga olingan. Uning aytishicha, 18-dekabr kuni Agalsova dala hovliga kelib, ishda muammolari borligini aytgan va stol ustiga bir dasta pul qo‘ygan. Bu yerda 20 ming dollar borligini va uni dala hovlidagi qo‘shniga saqlash uchun berish kerakligini aytgan. Agalsovaning o‘zi qo‘shnisiga 200 ming dollar berganligini aytgan. Politsiya esa qo‘shnidan 149 ming dollar pul topgan.
Makovozga ayblov e’lon qilmasdan qo‘yib yuborishgan. U Agalsova ko‘rsatgan pul qayerdan kelganini bilmagani, uni Agalsovaning o‘z jamg‘armasi deb o‘ylaganini aytganidan keyin gumonlanuvchi emas, guvohga aylangan. Agalsovaning o‘zi talon-torojda ayblanmoqda. U hibsda saqlangan, lekin u dastlab uy qamog‘iga o‘tkazildi, keyin esa chiqib ketmaslik haqidagi tilxat bilan ozod etildi. TIVdan yo‘qolgan pullar haligacha topilmagan. Yolg‘on detektorida o‘tkazilgan tekshiruv ko‘rsatishicha, Agalsova pullarning qayerdaligini biladi, deya qayd etadi “REN TV”.
TIV pul yo‘qolganini tasdiqlagan. “2019-yilda Rossiya TIV Valyuta-moliya departamenti kassasidan yirik qiymatdagi naqd pul yo‘qolganini aniqladi. Pullarning yo‘qolishi holati bo‘yicha vazirlik rahbariyati darhol huquq-tartibot organlariga murojaat qildi. Tekshiruv chog‘ida valyuta-moliya departamenti xodimasiga ayblov qo‘yildi”, — deya ma’lum qildi muassasa vakili “RIA Novosti”ga.
Ish bo‘yicha tergov yakunlangan, sud 30-dekabr kuni bo‘lib o‘tadi, deb xabar berdi “Moskva” agentligi.
Izoh (0)