Қозоғистонликлар коронавирус туфайли киритилган чекловлар устидан яна судга мурожаат қилди

Қозоғистоннинг Нур-Султон шаҳар апелляция суди санитария қоидалари орқали киритилган чекловлар аҳолининг конституциявий ҳуқуқларига зид келиши ва соғлиқни сақлаш вазири уларни тасдиқлаш учун ҳуқуққа эга эмаслиги юзасидан шикоят қилган бир гуруҳ қозоғистонликларнинг даъволарини асоссиз деб топди. Бу ҳақда Tengrinews шаҳар суди матбуот хизматига таяниб хабар бермоқда.

Аввалроқ бир гуруҳ фуқаролар пойтахтнинг Есил туман судига соғлиқни сақлаш вазири буйруғи билан тасдиқланган санитария қоидалари бандларини қонунга ва Конституцияга зид деб топиш ҳақидаги даъво билан мурожаат қилган эди. Биринчи инстанция суди қозоғистонликларнинг шикоятини қондирмаган эди.

«Даъвогарлар қарор устидан Нур-Султон шаҳар судига шикоят қилиб, индивидуал ҳимоя воситалари ва антисептиклардан фойдаланиш, шу жумладан, тиббиёт ниқобларини тақиш ва 65 ёшдан ошган шахслар учун алоҳида чекловларни кўзда тутувчи санитария қоидалари орқали киритилган чекловлар фуқароларнинг конституциявий ҳуқуқларини чеклашини ҳамда соғлиқни сақлаш вазири уларни тасдиқлаш учун ваколатга эга эмаслигини иддао қилган.

Апелляция кўрсатилган далилларни асоссиз деб топди ва биринчи инстанция суди қарорини қонунийлиги ва асослилиги учун ўзгаришсиз қолдирди», — дейилади хабарда.

Эслатиб ўтамиз, 25 декабрдан Қозоғистонда коронавирус туфайли янги чекловлар кучга кирди. Хусусан, томоша, спорт ва бошқа оммавий тадбирлар, шу жумладан, Янги йил тадбирлари ва байрам корпоративларини ўтказиш тақиқланди. Эпидемиологик вазият барқарорлашгунича Тенгиз нефть-газ конида чеклов чоралари кучайтирилди ҳамда коронавирусга қарши дори воситаларининг чакана нархлари ўртача 24 фоизга пасайтирилди.

Бозорларнинг ишлаш вақти соат 18:00 гача, кинотеатрларники — 20:00 гача қисқартирилади, савдо-кўнгилочар марказлар ва гипермаркетлар соат 22:00 да ёпилади.

Жаҳон соғлиқни сақлаш ташкилоти маълумотларига кўра, Қозоғистонда коронавирусга чалинганлар сони 193 503 кишига етган. Шуларнинг 2669 нафари вафот этган. Сўнгги бир кеча-кундузда 754 киши вирусни юқтирган.