Ижтимоий тармоқларда 24 декабрь куни ички ишлар ходимлари бир фуқаронинг қўлига кишан солган ҳолда олиб кетаётгани акс этган видео тарқалди, видео изоҳларида мазкур фуқаро Денов шаҳри ИИБ бошлиғининг устидан шикоят қилгани учун олиб кетилгани айтиган. Ўзбекистон Ички ишлар вазирлиги ахборот хизмати мазкур видео бўйича маълумот берди.
Сурхондарё вилояти ИИБ маълумотига кўра, Денов шаҳридаги Ўзбекистон кўчасида яшовчи фуқаро И.А. 2019 йилнинг ноябрь ойида ўзига тегишли бўлмаган, «Намуна» маҳалласида жойлашган 4 сотих ер майдонини алдов йўли билан фуқаро А.А.га 45 миллион сўмга сотиб, пулларини ўзлаштириб юборган. Фуқаро И.А. ўзининг жиноий ҳаракатларини давом эттириб, ушбу ер майдонини 2020 йилнинг июнь ойида фуқаро В.Х.га ҳам 49 миллион сўмга сотган.
Ушбу ҳаракатларида Ўзбекистон Республикаси Жиноят кодексининг 168-моддаси 3-қисми «б» бандида (такроран ёки хавфли рецидивист томонидан содир этилган фирибгарлик) кўрсатилган фирибгарлик жиноятини қасддан содир этиш аломатлари юзасидан И.А.га нисбатан Сурхондарё вилояти ИИБ томонидан жиноят иши қўзғатилиб тергов ҳаракатлари олиб борилган.
Вазирлик хабарига кўра, гумон қилинувчи И.А. бир неча марта расмий равишда терговга чақиртирилган. Фуқаро ички ишлар органлари ходимларининг қонуний талабларини бажаришдан бош тортганлиги сабабли вилоят ИИБ тергов бошқармасининг 2020 йил 24 декабрдаги «Мажбурий келтириш» қарорига асосан, гумонланувчи И.А. Денов тумани ички ишлар органлари ходимлари томонидан мажбурий тартибда терговга олиб келиниши таъминланган.
ИИВ томонидан билдирилишича, видеоёзувда фуқаро И.А.нинг Денов тумани ички ишлар органлари ходимлари томонидан мажбурий тартибда терговга олиб келиниши ҳолати тасвирланган.
«Шунингдек, ҳозирда ички ишлар органлари ходимларининг қонуний ҳаракатларига тўсқинлик қилиб, уларнинг хизмат вазифаларини бажаришлари билан боғлиқ қонуний талабларини бажармасликка омма олдида даъватлар қилган ҳамда ходимларни обрўсизлантиришга қаратилган ҳаракатларни амалга оширган фуқароларни аниқлаш ва қонуний чора кўриш ишлари амалга оширилмоқда», — дейилади Ички ишлар вазирлиги хабарида.
Изоҳ (0)