“Fransiyadagi birinchi raqamli it”: Makronning iti boshpanasiz hayvonlarga yordam ko‘rsatishga chaqiruvchi rolikda suratga tushdi

Fransiya prezidenti Emmanuel Makronning Nemo laqabli iti boshpanasiz hayvonlarni qo‘llab-quvvatlashga mo‘ljallangan rolikda suratga tushdi. Fransiya rahbari ushbu video bilan o‘zining ijtimoiy tarmoqlardagi sahifasi orqali bo‘lishgan, deb yozadi Esquire.

Rolikdagi subtitrlarda labrador va griffon duragayi qanday qilib prezident oilasiga kelib qolganini “so‘zlab beradi”: “Tarixim rad etilishdan boshlangan. Meni ko‘chaga tashlab ketishgan, xuddi har yili Fransiyada 100 minglab boshqa hayvonlarni tashlab ketishgani kabi”. Nemo fransuzlarni Rojdestvo munosabati bilan boshpanasiz hayvonlarni boqib olishga chaqirgan.

https://www.facebook.com/1535230416709539/videos/141468751085968

Shuningdek, rolikda yanvar oyida fransuz parlamenti hayvonlarga nisbatan shafqatsiz munosabatlarga qarshi kurash doirasida ularni “boqib olish”ga doir qonun loyihasini ko‘rib chiqishi aytiladi. Hujjat bilan hayvonlarni qutqarish markazlari va potensial xo‘jayinlariga “xabardorlik sertifikati”ni topshirish uchun 20 million yevro ajratilishi nazarda tutilgan. Kam ta’minlangan oilalar xonaki hayvonlari uchun veterinariya xizmatlaridan foydalanishda davlatdan subsidiya olishi mumkin bo‘ladi.

Makron va uning turmush o‘rtog‘i Nemoni Parij yaqinidan 250 yevroga sotib olgan. It mamlakat prezidentining eng sevimli kitobi “Suv ostida 80 ming kilometr” (Jyul Vern) qahramoni sharafiga shu kabi laqabga ega bo‘lgan.