«Франциядаги биринчи рақамли ит»: Макроннинг ити бошпанасиз ҳайвонларга ёрдам кўрсатишга чақирувчи роликда суратга тушди

Франция президенти Эммануэль Макроннинг Немо лақабли ити бошпанасиз ҳайвонларни қўллаб-қувватлашга мўлжалланган роликда суратга тушди. Франция раҳбари ушбу видео билан ўзининг ижтимоий тармоқлардаги саҳифаси орқали бўлишган, деб ёзади Esquire.

Роликдаги субтитрларда лабрадор ва гриффон дурагайи қандай қилиб президент оиласига келиб қолганини «сўзлаб беради»: «Тарихим рад этилишдан бошланган. Мени кўчага ташлаб кетишган, худди ҳар йили Францияда 100 минглаб бошқа ҳайвонларни ташлаб кетишгани каби». Немо французларни Рождество муносабати билан бошпанасиз ҳайвонларни боқиб олишга чақирган.

https://www.facebook.com/1535230416709539/videos/141468751085968

Шунингдек, роликда январь ойида француз парламенти ҳайвонларга нисбатан шафқатсиз муносабатларга қарши кураш доирасида уларни «боқиб олиш»га доир қонун лойиҳасини кўриб чиқиши айтилади. Ҳужжат билан ҳайвонларни қутқариш марказлари ва потенциал хўжайинларига «хабардорлик сертификати»ни топшириш учун 20 миллион евро ажратилиши назарда тутилган. Кам таъминланган оилалар хонаки ҳайвонлари учун ветеринария хизматларидан фойдаланишда давлатдан субсидия олиши мумкин бўлади.

Макрон ва унинг турмуш ўртоғи Немони Париж яқинидан 250 еврога сотиб олган. Ит мамлакат президентининг энг севимли китоби «Сув остида 80 минг километр» (Жюл Верн) қаҳрамони шарафига шу каби лақабга эга бўлган.