Toshkent shahrida, 23-dekabr kuni O‘zbekiston Oliy sudining iqtisodiy ishlar bo‘yicha sudlov hay’ati sud majlisida elektr energiyasidan uzilish bo‘lgani boisi sud majlisi boshqa kunga qoldirildi. Bu haqda sud majlisida ishtirok etgan “Daryo” muxbiri Musulmonbek Ibrohimov xabar bermoqda.
Oliy sudning nazorat shikoyatini ish yuritishga qabul qilish va uni ko‘rib chiqish uchun sudlov hay’atiga o‘tkazish to‘g‘risidagi ajrimiga ko‘ra, “Ruxsor Shahnoza” xususiy korxonasining nazorat shikoyati Oliy sudning iqtisodiy ishlar bo‘yicha sudlov hay’ati tomonidan iqtisodiy ishlar bo‘yicha sudlov hay’ati binosi (Toshkent shahri, Cho‘ponota ko‘chasi)da 23-dekabr kuni soat 10:00 da ko‘rib chiqilishi belgilangan.
Sud majlisi aytilgan vaqtdan 30 daqiqa o‘tib, kech boshlandi. Sud ishi boshlanganiga o‘n daqiqa bo‘lmasidan elektr energiyasida uzilish ro‘y berdi. Sudda Buxoro viloyat iqtisodiy sudidan videokonferensiya orqali tomonlardan birining vakili, ya’ni “Qishloqqurilishbank”ining viloyat bo‘limi xodimi ishtirok etishi rejalashtirilgan. Shu bois sudga raislik qiluvchi sudda ishtirok etayotgan “Qishloqqurilishbank”ning respublika boshqaruvi vakilidan Buxoro viloyatidan ishtirok etadigan xodim ishni ko‘rib chiqishda qanchalik muhimligini so‘radi. Vakil Buxoro viloyatidan ishtirok etadigan xodim ish bilan yaqindan tanish ekanligi va asosiy ma’lumot beruvchi ekanligini aytib o‘tdi.
Sudga raislik qiluvchi sudya elektr energiyasidagi uzilish sud ishiga ta’sir o‘tkazgani uchun O‘zbekiston Iqtisodiy protsessual kodeksiga ko‘ra, sudni to‘xtatishga sabab bo‘layotganini aytib, sudni 24-dekabr kuniga qoldirdi.
Majlisda ishtirok etayotganlar sud ishini to‘xtatmasdan elektr energiyasi tiklanishini aytib, biroz vaqt kutishni taklif qilishgan edi, bunga javoban sudya avvalroq “kun bo‘yi chiroq bo‘lmaganini” aytib o‘tdi.
Sud hay’ati OAV vakillariga sud ishini tasvirga olishga ruxsat bermadi. Shu bois sud majlisni sur’atga olishning iloji bo‘lmadi.
“Hududiy elektr tarmoqlari” matbuot xizmati “Daryo” muxbiriga holat bo‘yicha izoh berishni aytib, qayta aloqaga chiqmadi.
Mavzuga doir:
- Shavkat Mirziyoyev elektr energiyasi, tabiiy gaz va ko‘mir ta’minotida yo‘l qo‘yilayotgan noqonuniy xatti-harakatlar haqida gapirdi
- “Elektr, tabiiy va suyultirilgan gaz, issiqlik ta’minotidagi uzilishlar hamda benzin narxining oshgani aholining haqli e’tirozlariga sabab bo‘lmoqda” – Shavkat Mirziyoyev
- O‘zbekistonda bir oila uchun suyultirilgan gaz real ehtiyojga nisbatan ancha kam yetkazilayotgani ma’lum qilindi
- Qashqadaryo hokimi viloyatda elektr ta’minoti soatlab rejasiz uzilayotgani ustidan Abdulla Aripovga shikoyat qildi. Bosh vazir vaziyat ikki kunda o‘nglanishiga va’da berdi
- Ha, shunaqa bo‘lishi ham mumkin: Samarqand viloyatida ikki sutka davomida 74 soat “svet” bo‘lmadi. Bunda MET javobgarlikni HETga, HET esa METga yuklamoqda
Izoh (0)