«Свет» ўчиб қолгани сабабли Олий суд мажлиси бошқа кунга қолдирилди

Тошкент шаҳрида, 23 декабрь куни Ўзбекистон Олий судининг иқтисодий ишлар бўйича судлов ҳайъати суд мажлисида электр энергиясидан узилиш бўлгани боиси суд мажлиси бошқа кунга қолдирилди. Бу ҳақда суд мажлисида иштирок этган «Дарё» мухбири Мусулмонбек Иброҳимов хабар бермоқда.

Олий суднинг назорат шикоятини иш юритишга қабул қилиш ва уни кўриб чиқиш учун судлов ҳайъатига ўтказиш тўғрисидаги ажримига кўра, «Рухсор Шаҳноза» хусусий корхонасининг назорат шикояти Олий суднинг иқтисодий ишлар бўйича судлов ҳайъати томонидан иқтисодий ишлар бўйича судлов ҳайъати биноси (Тошкент шаҳри, Чўпонота кўчаси)да 23 декабрь куни соат 10:00 да кўриб чиқилиши белгиланган.

Суд мажлиси айтилган вақтдан 30 дақиқа ўтиб, кеч бошланди. Суд иши бошланганига ўн дақиқа бўлмасидан электр энергиясида узилиш рўй берди. Судда Бухоро вилоят иқтисодий судидан видеоконференция орқали томонлардан бирининг вакили, яъни «Қишлоққурилишбанк»ининг вилоят бўлими ходими иштирок этиши режалаштирилган. Шу боис судга раислик қилувчи судда иштирок этаётган «Қишлоққурилишбанк»нинг республика бошқаруви вакилидан Бухоро вилоятидан иштирок этадиган ходим ишни кўриб чиқишда қанчалик муҳимлигини сўради. Вакил Бухоро вилоятидан иштирок этадиган ходим иш билан яқиндан таниш эканлиги ва асосий маълумот берувчи эканлигини айтиб ўтди.

Судга раислик қилувчи судья электр энергиясидаги узилиш суд ишига таъсир ўтказгани учун Ўзбекистон Иқтисодий процессуал кодексига кўра, судни тўхтатишга сабаб бўлаётганини айтиб, судни 24 декабрь кунига қолдирди.

Мажлисда иштирок этаётганлар суд ишини тўхтатмасдан электр энергияси тикланишини айтиб, бироз вақт кутишни таклиф қилишган эди, бунга жавобан судья аввалроқ «кун бўйи чироқ бўлмаганини» айтиб ўтди.

Суд ҳайъати ОАВ вакилларига суд ишини тасвирга олишга рухсат бермади. Шу боис суд мажлисни суръатга олишнинг иложи бўлмади.

«Ҳудудий электр тармоқлари» матбуот хизмати «Дарё» мухбирига ҳолат бўйича изоҳ беришни айтиб, қайта алоқага чиқмади.