Qoraqalpog‘istonda va Samarqand viloyatida ikki kishi sovuq urishi oqibatida halok bo‘ldi, bu haqda Ichki ishlar vazirligi birlashgan tahririyati xabar berdi.
2020-yilning 6-dekabr kuni bedarak yo‘qolgani uchun qidiruvga berilgan Qoraqalpog‘iston Respublikasining Xo‘jayli tumani “Sarishingul” ovul fuqarolar yig‘ini hududida yashagan, 1991-yilda tug‘ilgan N.R.ning tashqi ko‘rinishidan jarohatsiz jasadi “Kulab” ovul fuqarolar yig‘ini hududidan topilgan.
O‘tkazilgan sud-tibbiy ekspertizasining dastlabki xulosasiga ko‘ra, u tananing umumiy sovqotishidan halok bo‘lgani aniqlangan.
Xuddi shunday holat Samarqand viloyatining Paxtachi tumanida ham yuz berdi. 2020-yilning 17-dekabrdagi ma’lumotga ko‘ra, “Farovon Yo‘ldoshobod” mahalla fuqarolar yig‘ini hududida joylashgan “Agrosanoat” MChJga tegishli dala maydonidan 30-35 yoshlardagi noma’lum erkak kishining tashqi ko‘rinishidan jarohatsiz jasadi topilgan.
O‘tkazilgan sud-tibbiy ekspertizasining xulosasiga ko‘ra, u tananing umumiy sovqotishidan vafot etgan. Ko‘rilgan choralar natijasida jasadning shaxsi aniqlangan. U Narpay tumanida yashagan, 1990-yilda tug‘ilgan N.V. ekanligi ma’lum bo‘lgan.
Ayni paytda har ikki holat yuzasidan surishtiruv harakatlari olib borilmoqda.
Izoh (0)