Poytaxt hokimligi “Toshkent shahar ko‘chalaridagi tirbandlikning oldini olish maqsadida transport vositalari harakatini tartibga solish to‘g‘risida”gi qaror loyihasini e’lon qildi.
Muhokamaga taqdim etilgan qaror loyihasida N1 toifadagi transport vositalarining (og‘irligi 3,5 tonnagacha bo‘lgan yuk mashinalari) shahar ichida harakatlanishini soat 07:00 dan 10:00 gacha va 17:00 dan 20:00 gacha cheklash taklif qilingan. Bu ertalab va kechqurungi tig‘iz vaqtlarda shaharda tirbandliklarga qarshi kurashish uchun amalga oshirilganligi tushuntirilgan.
Shuningdek, Toshkent shahrining markaziy ko‘chalarida harakat xavfsizligini ta’minlash va transport vositalarining qatnovini tartibga solish maqsadida markaziy ko‘chalar bo‘ylab tirkamali aravalar (ot yoki boshqa hayvonlarga qo‘shib tortiladigan yoki odam mushak kuchi bilan harakatga keltiriladigan dvigatel bilan jihozlanmagan, yuk tashishga mo‘ljallangan qurilma)ning harakatini cheklash rejalashtirilgan.
Loyihani muhokama qilish 2021-yil 5-yanvargacha davom etadi.
Avvalroq Toshkentdagi 24 ta yirik chorrahaning harakatlanish tartibini optimallashtirish orqali tirbandlikni 64 foiz kamaytirish rejalashtirilgani, Shavkat Mirziyoyev Toshkentning markaziy ko‘chalariga parkomatlar o‘rnatish bo‘yicha topshiriq bergani hamda qor yog‘gan kunda Toshkent ko‘chalari 10 ballik tirbandliklar ichida qolgani haqida xabar berilgandi.
Izoh (0)